कपाशीच्या नांदेड ४४ बीटी बियाण्याची ५ हजार पाकिटे होणार उपलब्ध

परभणी ः महाबीज आणि वसंतराव नाईक मराठवाडा कृषी विद्यापीठ यांच्या संयुक्त विद्यमाने विकसित करण्यात आलेल्या संकरित कपाशीच्या नांदेड ४४ बीटी (बीजी २) या वाणाच्या बियाण्याची ५ हजार ३२५ पाकिटे महाबीजच्या परभणी विभागाअंतर्गतच्या चार जिल्ह्यांमध्ये विक्रीसाठी उपलब्ध करून दिली जाणार आहेत. तसेच परभणी विभागातील सहा जिल्ह्यांमध्ये खरीप पिकाच्या १ लाख ८८ हजार ८४ क्विंटल बियाण्यांचा पुरवठा केला जाणार आहे. त्यापैकी आजवर ५० हजार २२२ क्विंटल बियाण्याचा पुरवठा करण्यात आला आहे. या संदर्भात महाबीजचे विभागीय व्यवस्थापक एस. पी. गायकवाड यांनी माहिती दिली.

वसंतराव नाईक मराठवाडा कृषी विद्यापीठाने विकसित केलेला वाण अनेक बाबतीत सरस असल्यामुळे एकेकाळी शेतकऱ्यांमध्ये लोकप्रिय ठरलेला कपाशीचा नांदेड ४४ हा वाण अनेक वर्षाच्या संशोधन चाचण्या घेऊन बीटीमध्ये परावर्तित करण्यात आला आहे. महाबीजतर्फे यंदाच्या खरीप हंगामापासून नांदेड ४४ बीटी (बीजी २) वाणाचे बियाणे शेतकऱ्यांना लागवडीसाठी उपलब्ध होणार आहे. मर्यादित प्रमाणात बिजोत्पादन घेण्यात आल्यामुळे यंदा परभणी, हिंगोली, नांदेड, लातूर या चार जिल्ह्यांतील नांदेड ४४ बीटी (बीजी २) या वाणाच्या बियाण्याची ५ हजार ३२५ पाकिटे उपलब्ध करून देण्यात येणार आहेत.

खरीप हंगामात पेरणीसाठी सोयाबीनच्या (१ लाख ७४ हजार १७० क्विंटल), मुगाच्या (१ हजार क्विंटल), उडिदाच्या (५ हजार २७० क्विंटल), तुरीच्या (४ हजार १०५ क्विंटल), ज्वारीच्या २ हजार ७९ क्विंटल), बाजरीच्या ( ५०० क्विंटल), मक्याच्या (९०० क्विंटल), सुधारित कपाशी (३० क्विंटल), तिळाच्या (३० क्विंटल) असे एकूण १ लाख ८८ हजार ८४ क्विंटल बियाण्याचा पुरवठा महाबीजच्या परभणी विभागाअंतर्गतच्या परभणी, हिंगोली, नांदेड, लातूर, उस्मानाबाद, सोलापूर या सहा जिल्ह्यांमध्ये केला जाणार आहे, असे गायकवाड यांनी सांगितले.