नांदेड जिल्ह्यात नऊ हजार जमीन आरोग्यपत्रिकांचे होणार वाटप

नांदेड  : राष्ट्रीय शाश्वत शेती अभियानांतर्गत पथदर्शी प्रकल्पांतर्गत जिल्ह्यातील १६ गावांतील ८ हजार ६४० शेतकऱ्यांची निवड झाली. गावशिवारातील सर्व विहितीखालील क्षेत्राचे माती परीक्षण करून त्यांना ९ हजार ८७ जमीन आरोग्यपत्रिका वितरित करण्यात येतील, अशी माहिती मिळाली. 

या प्रकल्पांतर्गत जिल्ह्यातील प्रत्येक तालुक्यातील १ गाव, या प्रमाणे एकूण १६ गावांची निवड करण्यात आली. निवड झालेल्या १६ गावांतील एकूण खातेदार शेतकऱ्यांची संख्या ८ हजार ६४० आहे. त्यांचे एकूण विहितीखालील क्षेत्र १० हजार ५६६ हेक्टर आहे. प्रत्येक शेतकऱ्यांच्या गाव शिवारात विविध ठिकाणी विहितीखालील क्षेत्रातून माती नमुने काढण्यात येतील. माती परीक्षणानंतर निवड शेतकऱ्यांना एकूण ९ हजार ८७ जमीन आरोग्यपत्रिका देण्यात येतील. 

नांदेड, अर्धापूर, मुदखेड, लोहा, कंधार, मुखेड, हदगाव, हिमायतनगर, भोकर, उमरी या १० तालुक्यांतील ५ हजार ८२२ शेतकऱ्यांच्या ७ हजार १३ हेक्टर विहितीखालील क्षेत्रातून ६ हजार ८९ मृदा नमुने काढण्यात येतील. या मृदा नमुन्यांचे परीक्षण नांदेड येथील जिल्हा मृद सर्वेक्षण व मृद चाचणी प्रयोगशाळेत केले जाईल.

देगलूर, बिलोली, नायगाव, धर्माबाद, किनवट, माहूर या सहा तालुक्यांतील २ हजार ८१८ शेतकऱ्यांच्या ३ हजार ५५३ हेक्टर क्षेत्रावरून २ हजार ९९८ मृदा नमुने काढण्यात येतील. त्यांचे परीक्षण सगरोळी येथील कृषी विज्ञान केंद्राच्या प्रयोगशाळेत केले जाईल, असे जिल्हा मृद सर्वेक्षण आणि मृदा चाचणी प्रयोगशाळेतील सूत्रांनी सांगितले.

तालुकानिहाय निवडलेल्या गावातील स्थिती