‘नाशिक पशुसंवर्धन’ टॅगिंगमध्ये राज्यात तिसरा

नाशिक : आधारकार्डच्या धर्तीवर दुधाळ जनावरांना कायमस्वरूपी क्रमांक देण्याच्या अर्थात टॅगिंग करण्याच्या कामात नाशिक जिल्हा परिषदेचा पशुसंवर्धन विभाग राज्यात तिसऱ्या क्रमांकावर आहे. आतापर्यंत जिल्ह्यातील ३३ हजार ५६८ जनावरांना टॅगिंग झाले असून त्यांची माहितीही संगणकात भरण्यात आली आहे.  राज्यभरात २२ लाख दुधाळ जनावरांना टॅगिंग करण्याचे उद्दिष्ट असून, त्यापैकी अवघ्या २ लाख ५७,०५३ जनावरांना टॅगिंग होऊन त्यांची माहिती संगणकात भरण्यात आली आहे म्हणजे अवघे ११.६८ टक्के काम झाले आहे. दुधाचे उत्पादन वाढवणे, दुधाळ जनावरांची संख्या वाढवणे या हेतूने गायी आणि म्हशींना क्रमांक देण्याचे काम हाती घेण्यात आले आहे. म्हणजे संबंधित गाय किंवा म्हशीला एकदा टॅगिंग केल्यानंतर संपूर्ण माहिती संगणकात भरली जाणार असून, संबंधित जनावराची विक्री झाल्यानंतरही नवीन ठिकाणी या जनावरासंदर्भात सर्वच माहिती एका क्लिकवर उपलब्ध होणार आहे.  राज्यातील ३४ जिल्ह्यांमध्ये सद्यस्थितीत टॅगिंग करणे आणि संगणकात माहिती भरण्याचे काम सुरू आहे. राज्यात दुधाळ जनावरांची संख्या एकूण २२ लाख असून, त्यात नाशिक जिल्ह्यातील १ लाख ७ हजार ३०० जनावरांचा समावेश आहे. पशुसंवर्धन विभागाने यापैकी ३३ हजार ५६८ जनावरांना टॅगिंग करून माहिती संगणकात भरली आहे. देशात कुठेही या जनावरांची माहिती उपलब्ध होणार आहे. म्हणजे २८.६२ टक्के काम झाले असून, राज्यात हे काम तिसऱ्या क्रमांकाचे ठरले आहे. हिंगोली जिल्ह्यात अवघी २८ हजार दुधाळ जनावरे असून, त्यापैकी ८ हजार ५८३ जनावरांना टॅगिंग झाले आहे. हे काम ३०.६५ टक्के झाले असून हा जिल्हा राज्यात पहिल्या क्रमांकावर आहे. तर २९.५६ टक्के काम झालेला भंडारा जिल्हा दुसर्‍या क्रमांकावर आहे. या जिल्ह्यात २३ हजार ९०० दुधाळ जनावरे असून, त्यापैकी ७ हजार ६५ जनावरांना टॅगिंग झाले आहे. या कामात सोलापूर जिल्हा पिछाडीवर आहे. १ लाख ६६ हजार २०० जनावरे असून, यापैकी अवघ्या ६ हजार २६३ जनावरांना टॅगिंग होऊन माहिती संगणकात भरण्यात आली आहे. हे काम अवघे ३.७७ टक्के इतके  आहे.