नाशिक जिल्ह्यात कर्जवसुलीसाठी आता धडक मोहीम

नाशिक : जिल्हा मध्यवर्ती सहकारी बॅंकेची आर्थिक स्थिती नाजूक असल्याने बॅंकेतर्फे कर्जवसुली मोहीम पुन्हा जोमाने सुरू करण्यात आली आहे. त्यासाठी बॅंकेच्या अधिकारी व कर्मचाऱ्यांना मैदानात उतरविण्यात आले असून, ते तालुक्‍यातील गावागावांत दौरे करत आहेत. बॅंकेची आर्थिक स्थिती सुधारण्यासाठी कर्जवसुलीचे उद्दिष्ट पूर्ण करण्याचे आदेश बॅंकेचे अध्यक्ष केदार आहेर यांनी दिले आहेत.

जिल्हा बॅंक अध्यक्षपदाची सूत्रे स्वीकारल्यापासून आहेर यांनी कर्जवसुलीसाठी धडक मोहीम उघडली आहे. त्यानुसार आतापर्यंत जंगम आणि थकबाकी असलेल्या वाहनांच्या जप्तीद्वारे २ कोटी रकमेची वसुली केली. मात्र वसुलीची रक्कम २ हजार ७६९ कोटी रुपये आहे. त्यापैकी केवळ ६७४ कोटींची वसुली असून, ही थकबाकी पोटी अवघी १९ टक्के आहे. थकबाकी पोटी आतापर्यंत २६८ कोटी ६० लाखांचे व्याज जमा झाले आहे. परिणामी, अधिकाधिक कर्जवसुलीसाठी २१ जूनपासून परत कर्जवसुली मोहीम राबविली जाणार आहे.

बॅंकेच्या वसुली अधिकाऱ्यांना प्राप्त १५६ अधिकारान्वये सहकार कायदा १९६० चे कलम १०७ नुसार जप्ती करून जिल्ह्यात आतापर्यंत ६०० ते ७०० थकबाकीदारांचे स्थावर जप्ती आदेश दैनिक वर्तमानपत्रात प्रसिद्ध करण्यात आले आहेत. पुढील लिलाव प्रक्रियेसंदर्भात कार्यवाहीसाठी आदेश देण्यात आलेले आहेत. उर्वरित तालुक्‍यातील ऐपतदार थकबाकीदारांवर जप्ती आदेश लवकरच प्रसिद्ध करण्याबाबत आदेश दिले आहेत. त्यासाठी अधिकारी व कर्मचाऱ्यांना मैदानात उतरविले असल्याची माहिती अध्यक्ष आहेर यांनी दिली.

कर्जमाफीचा लाभ घ्या सरकारच्या छत्रपती शिवाजी महाराज शेतकरी सन्मान योजनेअंतर्गत जिल्ह्यातील २१ हजार ७०० पैकी केवळ ११ हजार खातेदारांनी या योजनेचा लाभ घेतलेला आहे. योजनेची अंतिम मुदत ३० जून २०१८ अखेरपर्यंतच असल्याने उर्वरित अधिकाधिक खातेदारांनी लाभ घ्यावा, असे आदेश अध्यक्ष आहेर यांनी दिले आहेत.