राष्ट्रवादीचा आज हल्लाबोल

औरंगाबाद : येथे शनिवारी (ता.३) राष्ट्रवादी काँग्रेसच्या वतीने मराठवाड्यात आयोजित हल्लाबोल यात्रेचा समारोप केला जाणार आहे. यानिमित्ताने रॅली काढण्यात येणार असून, त्यानंतर पक्षाचे राष्ट्रीय अध्यक्ष व माजी केंद्रीय मंत्री शरद पवार यांच्या उपस्थितीत समारोप सभा होणार आहे.   उस्मानाबाद जिल्ह्यातील तुळजापूर येथून १६ जानेवारीला राष्ट्रवादी काँग्रेसच्या वतीने हल्लाबोल यात्रेला सुरवात करण्यात आली होती. या हल्लाबोल यात्रेचा मराठवाड्यातील पहिला टप्पा २४ जानेवारी रोजी बदनापूर येथील सभेने संपला. ९ दिवसांत मराठवाड्यातील ७ जिल्ह्यांतील २६ तालुक्‍यांतील २६ मतदारसंघांतून जवळपास दोन हजार किलोमीटरचा प्रवास करून राष्ट्रवादी काँग्रेसच्या सर्व नेत्यांनी २६ सभा, मोर्चे, पदयात्रा, मोटारसायकल रॅली, बैठका आदींच्या माध्यमातून मराठवाड्यातील जनतेशी संवाद साधला.  हल्लाबोल यात्रेचा समारोप ३ फेब्रुवारी रोजी औरंगाबाद येथे विभागीय आयुक्त कार्यालयापर्यंत रॅली आणि त्यानंतर होणाऱ्या जाहीर सभेने होणार आहे. दुपारी १ वाजता क्रांती चौकातून या रॅलीला सुरवात होणार आहे. दुपारी तीन वाजता ही रॅली विभागीय आयुक्त कार्यालयावर धडकणार आहे. निवेदन दिल्यानंतर हल्लाबोल यात्रेची समारोपीय सभा होईल. या सभेत माजी केंद्रीय कृषिमंत्री शरद पवार मार्गदर्शन करणार आहेत.  सरसकट कर्जमाफी, शेतीमालाला हमीभाव, बोंड अळीमुळे नुकसान झालेल्या कापूस उत्पादकांना हेक्‍टरी ५० हजारांची मदत, वाढती बेरोजगारी, महिलांवरील अत्याचार, राज्यातील कायदा व सुव्यवस्था, विद्यार्थी, शिक्षक, शेतकरी, सरकारी कर्मचारी, अंगणवाडी सेविका आदी प्रश्‍नांवर या सभेत सरकारला जाब विचारण्यात येणार आहे. कार्यकर्ते व शेतकऱ्यांना सहभागी होण्याचे आवाहन केले जात आहे.