निवडणूक अायोगाच्या बोधचिन्हाची मानवी रांगोळी

बुलडाणा : येथील जिजामाता प्रेक्षागारात पाच हजार विद्यार्थ्यांनी एकत्र येत निवडणूक अायोगाच्या बोधचिन्हाची मानवी रांगोळी तयार केली. हा ‘इंडियाज वर्ल्ड रेकॉर्ड’ झाला अाहे. हिरव्या, पांढऱ्या, काळ्या व केशरी रंगातील जर्सी परिधान केलेल्या विद्यार्थ्यांनी यात सहभाग घेतला. पाच मिनिटे मौन धारण करून मान झुकवून निवडणूक आयोगाच्या बोधचिन्हाची मानवी रांगोळी साकारण्यात अाली.

निवडणूक आयोगाचे उपमुख्य निवडणूक अधिकारी शिरीष मोहोड, जिल्हाधिकारी डॉ. निरूपमा डांगे, जिल्हा परिषद मुख्य कार्यकारी अधिकारी षण्मुखराजन, जिल्हा पोलिस अधीक्षक डॉ. दिलीप पाटील- भुजबळ, इंडियाज वर्ल्ड रेकॉर्डचे मनोहर तत्ववादी आदी उपस्थित होते. विद्यार्थ्यांच्या चित्रकला स्पर्धेतील ‘निवडणूक व मतदार जागृती` या विषयावरील उत्कृष्ट चित्रांचे मान्यवरांनी अवलोकन केले. विद्यार्थ्यांनी मानवी रांगोळी निवडणूक आयोगाच्या बोधचिन्हाप्रमाणे साकारली.

या रांगोळीची दखल इंडियाज वर्ल्ड रेकॉर्डच्या टीमने घेतली. त्यांनी रांगोळीचे व्हिडिओ चित्रीकरण केले. ही मानवी रांगोळी पाच मिनिटे ठेवून त्यांनी या उपक्रमाची नोंद केली. त्यानंतर निवडणूक आयागेाला त्याबाबतचे प्रमाणपत्र, इंडियाज् वर्ल्ड रेकॉर्डचे पुस्तक भेट म्हणून देण्यात आले. या वेळी मतदार जागृती मोहीम, विशेष संक्षीप्त पुनर्निरीक्षण कार्यक्रम, उपक्रमामध्ये उत्कृष्ट काम केलेल्या विद्यार्थी, शिक्षक, प्राचार्य, महिला बचत गट, उद्योजक, सामाजिक कार्यकर्ते, पतसंस्था चालक यांचा मान्यवरांच्या हस्ते सत्कार करण्यात आला.