जमिनीवर पडणारा प्रत्येक थेंब मुरविण्याची गरज ः गुट्टे

जमिनीवर पडणारा प्रत्येक थेंब मुरविण्याची गरज ः गुट्टे
जमिनीवर पडणारा प्रत्येक थेंब मुरविण्याची गरज ः गुट्टे

अंबाजोगाई, जि. बीड ः दरवर्षीचा पावसाचा खंड, पर्जन्यमानाचे कमी झालेले दिवस, वीज पडण्याचे वाढलेले प्रमाण तसेच जागतिक पातळीवर सरसरी तापमानामध्ये झालेली वाढ, यावर उपाययोजना करण्यासाठी गावाच्या शिवारात पडणारा प्रत्येक थेंब जमिनीत मुरविण्यासाठी काम करणे आवश्यक आहे. तसेच नैसर्गिक साधन संपत्तीचे संवर्धन गावोगावी होणे आवश्यक असल्याचे प्रतिपादन वसंतराव नाईक मराठवाडा कृषी विद्यापीठाचे कृषी विस्तार विद्यावेत्ता अरुण गुट्टे यांनी केले.

दिनदयाल शोध संस्थान, कृषी विज्ञान केंद्र अंबाजोगाई येथे राष्ट्रऋषी नानाजी देशमुख यांची १०२ वी जयंती कार्यक्रम आयोजित करण्यात आला होता. यानिमित्ताने आयोजित कार्यक्रमात ते बोलत होते. या वेळी कृषी विज्ञान केंद्राचे प्रभारी जयवंतराव ईटकुरकर, दिनदयाल शोध संस्थांनचे सदस्य डॉ. नितीन धर्मराव, केंद्राचे प्रभारी वरिष्ठ शात्रज्ञ -प्रमुख राजेसाहेब हारे यांची उपस्थिती होती.

कार्यक्रमाच्या प्रास्ताविकातून राजेसाहेब हारे यांनी नानाजीच्या कार्याची माहिती देऊन; नवीन कामासाठी त्यांच्या जीवनचरित्रातून प्रेरणा घेण्यासाठी जयंती समारोहाचे आयोजन केले असल्याचे सांगितले.

श्री. गुट्टे म्हणाले, प्राप्त परिस्थितीत जास्त पाणी लागणारे पिके घेऊ नयेत किंवा सूक्ष्म सिंचनाचा वापर कटाक्षाने करावा. तंत्रज्ञानाचा प्रसार होत आहे पण अंमलबजावणी होत नाही. आंतरपीक पद्धतीचा अवलंब करत पाण्याचा ताण सहन करणाऱ्या वाणाचा वापर करण्याची आवश्यकता आहे. वॉटर बँक ही संकल्पना प्रत्यक्षात आणण्यासाठी प्रत्येक शेतकऱ्याने आपल्या जमिनीचा १० व्या भागात शेततळे निर्माण करणे गरजेचे आहे. शेतीला जोडधंद्याची सांगड घालणे आवश्यक आहे. डॉ. धर्मराव म्हणाले, नानाजीचा जीवन प्रवास ध्येयाने प्ररित झालेला होता. लोकसंग्रह नानाजीच्या जीवनाचा अविभाज्य घटक होता.

जयवंतराव ईटकुरकर यांनी अध्यक्षीय भाषणात नानाजीच्या सामाजिक कार्याची माहिती देऊन त्यांनी आखून दिलेल्या मार्गाने कार्य करण्याची संधी मिळाल्याचे सांगितले. सूत्रसंचालन कृषी विस्तार शास्त्रज्ञ सुहास पंके यांनी केले. तर कृषी विद्या शास्त्रज्ञ कृष्णा कर्डिले यांनी आभार मानलेे. परिसरातील विविध गावांतून पुरुष-महिला शेतकरी मोठ्या संख्येने उपस्थित होते.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com