माती नमुने गोळा करण्याकडे कृषी कर्मचाऱ्यांचे दुर्लक्ष

पुणे  ः पुणे जिल्ह्यात गेल्या महिन्यात १५ मेपर्यंत माती नमुने काढण्यासाठी विशेष मोहीम हाती घेण्यात आली होती. या मोहिमेकडे कृषी विभागाच्या अनेक कर्मचाऱ्यांनी दुर्लक्ष केले आहे. त्यामुळे सुमारे ३७ हजार ९२२ माती नमुने घेण्याचे प्रलंबित राहिल्याचे चित्र आहे.  शेतकऱ्यांना शेतजमिनीतील मातीपरीक्षणाद्वारे जमिनीतील अन्नद्रव्याचे प्रमाण जाणून घेऊन त्यानुसार पुढील हंगामात घेतल्या जाणाऱ्या पिकांसाठी खतमात्रांची  शिफारस करण्यात येते. त्यासाठी मागील दोन वर्षांपासून मृद आरोग्य पत्रिकेचे वाटप करण्यात येते. त्यानुसार दरवर्षी माती नमुने घेतले जातात.  त्याची पू्र्वतयारी म्हणून लक्षांकाप्रमाणे निधी उपलब्ध करून देण्यात आला आहे. निवडलेल्या गावातील लागवडीयोग्य असलेल्या क्षेत्रामधून बागायत क्षेत्रासाठी अडीच हेक्टर व जिरायत क्षेत्रासाठी दहा हेक्टरमधून एक माती नमुना काढण्यात येतो. क्षेत्रीय पातळीवर कार्यरत असलेल्या कृषी विभागाच्या यंत्रणेमार्फत माती नमुने काढले जातात. त्यानंतर ते विश्लेषणासाठी माती चाचणी प्रयोगशाळेत पाठविण्यात  येतात. माती चाचणी प्रयोगशाळेत नमुना प्राप्त झाल्यानंतर विश्लेषणासाठी माती नमुना तयार करण्यात येतो. त्यानंतर पुढील घटकांसाठी प्रयोगशाळेत या नमुन्याची तपासणी केली जाते. केंद्र शासनाच्या मार्गदर्शक सुचनेनुसार एकूण बारा घटकांची विहीत पद्धतीने तपासणी करण्यात येते.  कृषी सहायकांनी माती नमुने गोळा करण्यासाठी प्रशिक्षित, माहितीगार तज्ज्ञ, शेतकरी किवा गावातील आत्माअंतर्गत नियुक्त केलेल्या कृषीमित्रांची मदत घेण्याच्या सूचना होत्या. तसेच संबंधित कृषी सहायकांनी गावातील माती नमुने काढण्यापूर्वी कालावधी निश्चित करून दवंडी देणे किवा सूचना लिहून सहभाग वाढविणे गरजेचे होते. परंतु तसे झाले नाही.