नेदरलँड्स तंत्राचे स्मार्ट गोठे उभे राहणार

बारामती, जि. पुणे : दुधाळ गाईंमध्ये उष्णतेच्या ताणामुळे होणारे नुकसान टाळण्यासाठी नेदरलँड्समधील व्हॅन हॉल लारेन्स्टाइन विद्यापीठ व अॅग्रिकल्चरल डेव्हलपमेंट ट्रस्ट, बारामतीदरम्यान नव्याने करार करण्यात आला आहे. यामध्ये स्मार्ट गोठे उभारण्याबरोबर उच्च प्रतीच्या गाईंच्या प्रजननाचे प्रयोग केले जाणार आहेत.

भारतीय भाजीपाल्याची गुणवत्ता, प्रत व उत्पादन वाढण्यासाठी नेदरलँड्सने तंत्रज्ञान पुरविल्यानंतर आता दुधाच्या उत्पादनासंदर्भात नेदरलँड्स लिव्हिंग लॅब कराराच्या दुसऱ्या टप्प्याची सुरवात २ नोव्हेंबर रोजी करण्यात आली. ट्रस्टचे प्रमुख राजेंद्र पवार, नेदरलँड्सच्या विद्यापीठाचे कुलपती व्हॅनडोझेन यांच्यात सामंजस्य करार झाला.

या करारावर माजी केंद्रीय कृषिमंत्री शरद पवार व राज्याचे कृषिमंत्री पांडुरंग फुंडकर यांनी भारताच्या वतीने तर नेदरलँड्सचे कृषिमंत्री अल्ड्रेक खिअरवेल्ड यांनी नेदरलँड्सच्या वतीने स्वाक्षऱ्या केल्या. या वेळी बारामती कृषी महाविद्यालयाचे प्राचार्य निलेश नलावडे, डॉ. डी. पी. भोईटे यांच्यासह नेदरलँड्स व बारामती कृषी महाविद्यालयाचे शिष्टमंडळ उपस्थित होते.

या प्रकल्पांतर्गत दुधाळ गाईंमध्ये उष्णतेच्या ताणामुळे होणारे नुकसान कमी करण्यासाठी उष्णतारोधक स्मार्ट गोठे उभारले जाणार आहेत. गाई -म्हशींमधील उत्पादनाच्या नोंदी ठेवण्यासाठी सहज उपयोग करता येऊ शकेल अशा मोबाईलवरील सॉफ्टवेअरची निर्मिती केली जाणार आहे. उच्च प्रतीच्या गाईंची निर्मिती करण्याकरिता प्रजननामध्ये सिद्ध वळू वापरून गुणवत्ता व दर्जा वाढविण्यावर भर दिला जाणार आहे,

त्यामध्ये भ्रूणप्रत्यारोपणासारखे पर्याय वापरले जाणार आहेत. उच्च दर्जाची दूधनिर्मिती व विक्री व्यवस्था वाढविण्यासाठी भारतीय गाईंचा वंशसुधार, प्रजजन व संवर्धन कार्यक्रम राबविला जाणार आहे. याखेरीज मुरघास तंत्रज्ञानाचा सहजासहजी वापर करण्याबाबत प्रत्यक्ष उपक्रम राबविला जाणार आहे.