अण्णासाहेब पाटील महामंडळाच्या नवीन कर्ज योजनांना मान्यता

अण्णासाहेब पाटील महामंडळाच्या नवीन कर्ज योजनांना मान्यता
अण्णासाहेब पाटील महामंडळाच्या नवीन कर्ज योजनांना मान्यता

मुंबई : आर्थिक मागास समाजातील तरुणांना व्यवसायासाठी अण्णासाहेब पाटील आर्थिक विकास महामंडळामार्फत आखलेल्या कर्ज व्याज परताव्याच्या तीन योजनांना राज्य शासनाने मान्यता दिली आहे. या संदर्भातील शासन निर्णयही काढण्यात आला असल्याची माहिती महसूलमंत्री तथा मराठा समाजाच्या मागण्यासंदर्भातील उपसमितीचे अध्यक्ष चंद्रकांत पाटील यांनी दिली. तसेच, मराठा आरक्षणासंदर्भात मागासवर्ग आयोगाची पहिली बैठक येत्या २९ नोव्हेंबर रोजी पुण्यात होणार असल्याचेही त्यांनी सांगितले. मराठा समाजाच्या मागण्यांसंदर्भातील उपसमितीची बैठक श्री. पाटील यांच्या अध्यक्षतेखाली नुकतीच झाली. या वेळी शिक्षणमंत्री विनोद तावडे, कामगारमंत्री संभाजीराव पाटील निलंगेकर, समितीचे सदस्य सचिव दिनेश वाघमारे उपस्थित होते. श्री. पाटील म्हणाले, की मराठा क्रांती मोर्चाच्या मागण्यावर राज्य शासनाने योग्य कार्यवाही सुरू केली आहे. यापूर्वीच आर्थिक मागास शुल्कासाठी उत्पन्न मर्यादा एक लाखावरून सहा लाख करणे, या मर्यादेतील इतर मागास समाजातील विद्यार्थ्यांचे निम्मे शिक्षण शुल्क सरकारने भरणे, ६०५ अभ्यासक्रमांचा समावेश छत्रपती शाहू महाराज शुल्क प्रतिपूर्ती योजनेत करणे, असे निर्णय घेतले आहेत. अण्णासाहेब पाटील आर्थिक विकास महामंडळामार्फत देण्यात येणाऱ्या सध्याच्या बीज भांडवल कर्ज योजना, गट प्रकल्प कर्ज योजना बंद करून नव्या योजनांना मान्यता देण्यात आली आहे. मराठा समाजातील तरुणांना उद्योगासाठी साह्य व्हावे, यासाठी या तीन योजना प्रस्तावित करण्यात आल्या होत्या. वैयक्तिक कर्ज व्याज परतावा, गट कर्ज व्याज परतावा, शेतकरी उत्पादक गटासाठी गट प्रकल्प कर्ज योजना, अशा तीन योजनांचा शासन निर्णय काढण्यात आला आहे. वैयक्तिक कर्ज व्याज परतावा योजनेत दहा लाखांपर्यंतचे कर्ज बँकेतून घेतल्यानंतर त्याचे व्याज महामंडळामार्फत लाभार्थीच्या खात्यात परत देण्यात येणार आहेत. गट व्याज परतावा योजनेत एका गटास दहा लाख ते जास्तीत जास्त ५० लाखांपर्यंतचे कर्ज घेतल्यास त्याचे व्याज परत करण्यात येणार आहे. तर शेतकरी उत्पादक गटाने अर्ज केल्यास महामंडळामार्फत या गटास दहा लाखांपर्यंत कर्ज बिनव्याजी मिळणार आहे. तसेच या तीनही योजनांत दिव्यांगांसाठी चार टक्के निधी राखीव ठेवण्यात आला आहे. या तीनही योजना संपूर्ण ऑनलाइन पद्धतीने राबविण्यात येणार असल्याचेही श्री. पाटील यांनी या वेळी सांगितले. डॉ. पंजाबराव देशमुख निर्वाह भत्ता योजनेअंतर्गत या वर्षी आतापर्यंत एक लाख ३५ हजार विद्यार्थ्यांनी लाभ घेतला आहे. मराठा समाजातील विद्यार्थ्यांसाठी वसतिगृह उभारण्यासाठी संस्थांना दहा हजार रुपये प्रतिविद्यार्थी अशी रक्कम देण्यात येणार आहे. तर कायमस्वरूपी वसतिगृहासाठी पाच कोटी राज्य शासन देणार आहे. त्या संदर्भातही आखणी सुरू आहे, अशी माहितीही त्यांनी या वेळी दिली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com