परराज्यांत ऊस विक्री बंदीची अद्याप सूचना नाही

मुख्यमंत्र्यांच्या अध्यक्षतेखालील मंत्री समितीने परराज्यांत ऊस नेण्यावर बंदी घातली असली, तरी ही समिती कायदेशीर नसल्यामुळे वाहतूक अजूनही सुरू आहे,’ असे साखर कारखानदार सूत्रांचे म्हणणे आहे.
परराज्यांत ऊस विक्री बंदीची अद्याप सूचना नाही
परराज्यांत ऊस विक्री बंदीची अद्याप सूचना नाही

पुणे : परराज्यांत ऊस विकण्यावर बंदी घालण्याचा निर्णय घेण्यात आलेला आहे. तरी अद्याप राज्य शासनाने अद्याप अधिसूचना काढलेली नाही, अशी माहिती सूत्रांनी दिली. या संदर्भात राज्य शासनाकडून अधिसूचना निघण्यासाठी सहकार विभागाने शासनाने प्रस्ताव पाठविला आहे. पुढील काही दिवसांत कायदेशीर बाबी पडताळून अधिसूचना निघू शकते, असे सहकार विभागाचे म्हणणे आहे.

‘महाराष्ट्राचा गाळप हंगाम एक नोव्हेंबरपासून सुरू होणार आहे. मात्र, कर्नाटकचा हंगाम सुरू झाल्यामुळे परराज्यांत ऊस जात आहे. परराज्यांतील ऊस वाहतूक वेळीच न थांबविल्यास पश्चिम महाराष्ट्रातील कारखान्यांना फटका बसू शकतो. मुख्यमंत्र्यांच्या अध्यक्षतेखालील मंत्री समितीने परराज्यांत ऊस नेण्यावर बंदी घातली असली, तरी ही समिती कायदेशीर नसल्यामुळे वाहतूक अजूनही सुरू आहे,’ असे साखर कारखानदार सूत्रांचे म्हणणे आहे.

राज्यात यंदा 9 लाख हेक्टरवरून 650 लाख टन ऊस उपलब्ध होण्याची शक्यता आहे. 175 कारखान्यांकडून यंदा 73 लाख क्विंटलपेक्षा जादा साखर तयार केली जाण्याचा अंदाज आहे. यंदा गेल्या वर्षीच्या तुलनेत उसाची हेक्टरी उत्पादकता 65 टनांऐवजी 80 टन मिळण्याची शक्यता आहे. मात्र, परराज्यांत ऊस किती जातो याचा उपलब्धतेवर परिणाम होईल, असे कारखान्यांचे म्हणणे आहे.

महाराष्ट्रात उसावरील झोनबंदी हटविण्यात आली आहे. त्यामुळे शेतकरी आपला ऊस कोणालाही विकू शकतो. त्यामुळे ऊसबंदी कशी करणार असा प्रश्न उपस्थित केला जात आहे. मात्र, ऊस नियंत्रण कायदा 1966 च्या कलम सहामधील ‘फ’ या पोटकलमाचा आधार घेण्याचा प्रयत्न सुरू असल्याचे सूत्रांनी स्पष्ट केले.

गेल्या सात वर्षांत तिसऱ्यांदा उसावर बंदी ‘ऊस नियंत्रण कायद्यानुसार कोणत्याही विशिष्ठ भागातील ऊस वाहतूक व वितरणावर प्रतिबंध करता येतो. यापूर्वी 2009-10 व 2012-13 च्या हंगामात परराज्यांतील उसावर बंदी घालण्यात आली होती. हंगाम संपेपर्यंत सक्षम अधिकाऱ्यांच्या परवानगीशिवाय राज्याबाहेर ऊस नेण्यास प्रतिबंध करणारी अधिसूचना काढण्यात आली होती. त्याचाच आधार घेत आता तिसऱ्यांदा ऊसबंदीची अधिसूचना काढण्याचा प्रयत्न सुरू आहे, अशी माहिती सहकार विभागाच्या सूत्रांनी दिली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com