भारतातून निर्यात होणाऱ्या तांदळाचा दर वाढला

नवी दिल्ली ः चांगल्या दर्जामुळे भारतीय बिगर बासमती तुकडा तांदळाला मागणी वाढली अाहे. यामुळे भारतातून निर्यात होणाऱ्या बिगर बासमती तांदळाच्या किमतीत जानेवारी ते सप्टेंबर दरम्यानच्या कालावधीत ७.२ टक्क्यांनी वाढ झाली अाहे, अशी माहिती अन्न अाणि कृषी संघटनेने (एफएओ) जाहीर केलेल्या मासिक अहवालातून दिली अाहे.

भारतातून होणाऱ्या बिगर बासमती तुकडा तांदळाचा दर जानेवारी ते अाॅगस्ट दरम्यान सरासरी प्रतिटन ३६० डॉलर होता. त्यात सप्टेंबरमध्ये वाढ होऊन तो प्रतिटन ३७३ डाॅलरवर पोचला अाहे, असे ‘एफएओ’ने अहवालात नमूद केले अाहे. गेल्या वर्षी २०१६ मध्ये जानेवारी ते सप्टेंबर दरम्यान तांदळाचा दर सरासरी प्रतिटन ३३५ डॉलर होता. त्यात यंदा वाढ झाली अाहे.

भारतातून निर्यात होणारा तांदूळ सहज उपलब्ध अाहे. तसेच बांगलादेशमधून मागणी वाढली अाहे. त्यामुळे तांदळाच्या दरात वाढ झाली अाहे. बांगलादेशमध्ये पुराने भात पिकाचे नुकसान झाले अाहे. त्यामुळे यंदा या देशात १.५ दशलक्ष टन भाताचे उत्पादन कमी झाले अाहे.

या पार्श्वभूमीवर भारतातून बांगलादेशमध्ये ५ लाख टन पारबाईल्ड तांदूळ निर्यात होणार अाहे. नाफेडमार्फत हा तांदूळ निर्यात केला जाणार अाहे. याअाधी भारतातून खासगी व्यापाऱ्यांनी दीड लाख टन तांदूळ बांगलादेशला निर्यात केला अाहे. अाता सरकारी एजन्सीमार्फत हा तांदूळ निर्यात होणार अाहे.

भारतीय बिगर बासमती तांदळाचा निर्यात दर (प्रतिटन- डॉलर)