‘नॉन एफएक्यू’ उडीद खरेदी प्रकरणाची चौकशी

चौकशीसाठी अधिकारी दाखल     अकोला : नाफेडच्या खरेदी केद्रांवर ‘नॉन एफएक्यू’ दर्जाचा उडीद खरेदी झाल्याने त्याचा शासनाला लाखोंचा फटका बसला अाहे. या संदर्भात अकोट बाजार समितीचे माजी सभापती गजानन पुंडकर यांनी शासनाकडे तक्रार केली अाहे. शासनाचे अधिकारी चौकशीसाठी अकोल्यात दाखल झाले अाहेत. ‘नॉन एफएक्यू’ दर्जाचा सुमारे चारशे क्विंटलपेक्षा अधिक उडिद खरेदी करणाऱ्यांविरुद्ध जबाबदारी निश्चित केली जाणार असल्याचे सांगितले जात अाहे.

‘ॲग्रोवन’ने या संदर्भात वृत्त दिले होते. नाफेडने उडीद खरेदी सुरू केल्यानंतर अकोट येथील खरेदी केंद्रावर शेतकऱ्यांचा उडीद एफएक्यू दर्जाचा नसल्याने परत करण्यात अाला होता. मात्र हा उडीद व्यापाऱ्यांनी कमी दराने खरेदी केला. त्यानंतर शेतकऱ्यांच्या सातबारावर नाफेडला विकल्या गेल्याचा आरोप आहे. श्री. पुंडकर यांनी केलेल्या तक्रारीत निकृष्ठ दर्जाचा २९०० क्विंटल मूग, उडीद अकोला वेअर हाउसवरून परत अाल्यानंतरही मुंबई येथील अधिकाऱ्यांच्या सूचनेवरून पुन्हा प्रोसेसिंग करून जमा करण्यात अाला. अकोट येथे शासनाकडून नाफेडची मूग, उडीद, सोयाबीन खरेदी हमीभावाने झाली. मूग, उडीद खरेदीची ३० डिसेंबर ही अंतिम तारीख होती. 

शासनाने त्याला २० जानेवारीपर्यंत मुदतवाढ दिली. यादरम्यान अकोट येथील खरेदी केंद्रावर मोठा घोळ झाला अाहे. या केंद्रावरून पाठवलेला २९०० क्विंटल माल अकोला येथील वेअर हाउसवरून दर्जा योग्य नसल्याच्या कारणाने परत पाठवला होता. परत आलेला हा माल बरेच दिवस पडून होता, परंतु नंतर त्याची विल्हेवाट लावण्यात अाली. नॉन एफएक्यू दर्जाच्या खरेदीमुळे नाफेड, महाराष्ट्र राज्य मार्केटिंग फेडरेशनला सुमारे लाखाेंचे नुकसान झाल्याचे सांगितले जात आहे. याची चौकशी करण्यासाठी राज्य मार्केटिंग फेडरेशनचे वरिष्ठ अधिकारी दाखल झाले अाहेत.