नाल्यात बीटी बियाणे फेकल्याप्रकरणी पोलिस तक्रार

मुदतबाह्य ४३ पाकिटे कृषी विभागाकडून जप्त यवतमाळ : एचटी बियाण्यांची अवैधरीत्या मोठ्या क्षेत्रावर लागवड झालेल्या यवतमाळ जिल्ह्यात एका कंपनीच्या बियाण्यांची पाकिटे नाल्यात बेवारस आढळून आली. ४३ मुदतबाह्य बियाणे पाकिटे नाल्यात आढळून आल्यानंतर खळबळ उडाली. या प्रकरणी कृषी विभागाने पोलिस तक्रार दिली असून, संबंधित कंपनीलादेखील आठ दिवसांत खुलासा करण्याचे निर्देश आहेत.  यवतमाळ शहरालगत वाहणाऱ्या एका नाल्यात बीटी बियाण्यांची पाकिटे फेकून देण्यात आली होती. या पाकिटावर बियाणे कालबाह्य होण्याचा कालावधी २०१६ असा नमूद होता. जिल्ह्यात यापूर्वी एचटी बियाण्यांची जीईसी परवानगी नसताना लागवड झाल्याचे समोर आले होते. एचटी बियाण्यांचा अवैध साठा जिल्ह्यात पोचला कसा, या प्रश्‍नाचा उलगडा अद्यापही यंत्रणांना करता आला नाही.  चौसळा नाल्यात दुर्गा गोल्ड सुपर ५ (बीजी-२) या वाणाची ४३ पाकिटे मिळाली. सुपर सीडस, सिकंदराबाद, वितरक ॲग्रीगोल्ड फूड अँड फार्म प्रोडक्‍ट असा त्यावर उल्लेख असल्याचे कृषी विभागाकडून सांगण्यात आले. या प्रकरणी जिल्हा परिषदेचे कृषी विकास अधिकारी कैलास वानखडे यांनी लोहारा पोलिस ठाण्यात कंपनीविरोधात तक्रार दिली. त्यात या प्रकरणाची चौकशी करून कारवाई करावी असे म्हटले आहे. कंपनी प्रशासनाला रीतसर पत्र देत त्यांनाही आठ दिवसांच्या आत बियाणे का आणि कोणी फेकले याचा खुलासा करावा, असे म्हटले आहे. यवतमाळ शहरानजीक नाल्यात ४३ बीटी बियाण्यांची पाकिटे मिळाली होती. या प्रकरणी पोलिस तक्रार करण्यात आली असून, कंपनीलादेखील खुलासा करण्याचे आदेश दिले आहेत, अशी माहिती अमरावती विभागीय गुण नियंत्रण अधिकारी डॉ. पंकज चेडे यांनी दिली.