तुरळक ठिकाणी हलक्या पावसाच्या सरी

तुरळक ठिकाणी हलक्या पावसाच्या सरी
तुरळक ठिकाणी हलक्या पावसाच्या सरी

पुणे : मध्य महाराष्ट्र व मराठवाड्याच्या दक्षिण भागात कमी दाबाच्या क्षेत्राचे काही प्रमाणात चक्राकार वाऱ्यामध्ये रूपातर झाले. गुरुवारी (ता.२५)  उस्मानाबाद जिल्ह्यातील येरमाळा, सरमकुंडी, वडगाव, येडशी; नगर जिल्ह्यातील बेलापूर, पारनेर साताऱ्यातील वाई येथे दुपारनंतर अचानक सोसाट्याचा जोरदार वारा सुटून ढग दाटून आले. त्यामुळे तुरळक ठिकाणी हलक्या सरी बरसल्या असून, शेतकऱ्यांची काही प्रमाणात तारांबळ उडाली.   मध्य महाराष्ट्राच्या दक्षिण भाग, कर्नाटक या परिसरात समुद्रसपाटीपासून सुमारे ९०० मीटर उंचीवर कमी चक्राकार वाऱ्यांची स्थिती तयार झाली आहे. तसेच विदर्भ ते तेलंगानादरम्यान कमी दाबाचा पट्टा तयार झाला आहे. हा पट्टा समुद्रसपाटीपासून नऊशे मीटर उंचीवर आहे. त्यामुळे राज्यात तुरळक ठिकाणी अचानक काळेकुट्ट ढग भरून येत असून, काही ठिकाणी हलक्या सरी बरसत आहेत. गुरुवारी (ता.२५) सकाळी आठ वाजेपर्यंतच्या चोवीस तासांत मध्य महाराष्ट्रातील मिरज, पाटण, तासगाव येथे वीस मिलिमीटर, फलटण, सांगली, विटा येथे दहा मिलिमीटर पाऊस पडला. मराठवाड्यातील उस्मानाबाद येथे ३० मिलिमीटर, बीड जिल्ह्यातील शिरूर, अनंतपाल येथे दहा मिलिमीटर पाऊस पडला.  उत्तरकडून काही प्रमाणात थंड वारे वाहण्यास सुरुवात झाल्याने खानदेशातील काही भागांत किमान तापमानात घट होत आहे. नाशिकमध्ये १४.६ अंश सेल्सिअसची सर्वांत कमी किमान तापमानाची नोंद गुरुवारी सकाळी आठ वाजेपर्यंत झाली. त्याचबरोबर मध्य महाराष्ट्र व मराठवाड्याच्या दक्षिण भागात ढगाळ हवामान असल्याने किमान तापमानात किचिंत वाढ झाली आहे. कोकण आणि विदर्भात हवामान कोरडे  होते.  किमान तापमानाबरोबर कमाल तापमानात काही अंशी चढउतार होत आहे. मुंबई जवळील सांताक्रूजमध्ये सर्वाधिक ३७.५ अंश सेल्सिअसची नोंद झाली. आज (ता.२६) संपूर्ण राज्यात हवामान कोरडे राहणार असून, काही प्रमाणात थंडी हातपाय पसरण्यास सुरुवात करण्याची शक्यता आहे.  

गुरुवारी (ता.२५) सकाळी आठ वाजेपर्यंचे किमान तापमान, अंश सेल्सिअसमध्ये) :   मुंबई (सांताक्रूज) २२.०, अलिबाग २१.५, ठाणे १८.२, रत्नागिरी २४.६, डहाणू २२.०, पुणे १८.४, नगर १८.०, कोल्हापूर २२.२, महाबळेश्वर १८.२, मालेगाव १९.२, नाशिक १४.६, सांगली १९.८, सातारा २०.७, सोलापूर २२.५, औरंगाबाद १७.६, परभणी १७.२, नांदेड २१.०, अकोला १९.३, अमरावती १८.८, बुलढाणा २०.८, चंद्रपूर २०.४, गोंदिया १७.२, नागपूर १६.५, वर्धा १७.५.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com