विदेश अभ्यास दौऱ्याच्या शेतकरी यादीत बदल नाही

विदेश अभ्यास दौऱ्याच्या शेतकरी यादीत बदल नाही
विदेश अभ्यास दौऱ्याच्या शेतकरी यादीत बदल नाही

पुणे : विदेश अभ्यास दौऱ्यासाठी निवड केलेल्या शेतकऱ्यांची आधीची यादी कायम ठेवण्याचा निर्णय कृषी विभागाने घेतला आहे. विदेश अभ्यास दौऱ्यासाठी शेतकऱ्यांना ५० टक्के अनुदान देण्याची योजना राज्य शासनाच्या खर्चातून राबविली जाते. शेतकऱ्याने ६१ हजार रुपये भरल्यानंतर तेवढेच अनुदान शासन देते. यामुळे इस्त्राईलचा सहा दिवस अभ्यास करण्याची संधी मिळते.   राज्यभरातून यंदा अर्ज मागविण्यात आले. ७५० शेतकऱ्यांची प्रतीक्षा यादी देखील तयार केली गेली आहे. तथापि, मार्चमध्ये वित्तीय वर्ष समाप्त होत असल्यामुळे या यादीबाबत पुढे काय निर्णय घेतला जाणार, याविषयी शेतकऱ्यांमध्ये उत्सुकता आहे.  “चालू वर्षात विदेशी दौऱ्यांसाठी शेतकऱ्यांना वाटण्याकरिता ३५ लाख रुपये मंजूर झाले आहेत. यातून ५२ शेतकऱ्यांना अलीकडेच इस्त्राईलच्या दौऱ्यावर नेण्यात आले. मात्र, अनुदान अजून शिल्लक आहे. पुढील वर्षी मात्र जादा अनुदान आणि जास्त शेतकऱ्यांना विदेश दौऱ्यावर पाठविण्याचा प्रयत्न आमचा आहे,’’ अशी माहिती सूत्रांनी दिली.  आत्माचे संचालक अनिल बनसोडे यांच्या म्हणण्यानुसार, विदेश अभ्यास दौऱ्यासाठी युरोपपेक्षाही आम्ही जास्त पसंती इस्त्राईलसाठी दिली आहे. पुढील सर्व दौरे इस्त्राईलकडेच जातील. सूक्ष्म सिंचन, दुग्ध व्यवसाय, पशुधन आणि प्रक्रिया उद्योगाची चांगली माहिती शेतकऱ्यांना मिळत असल्याचे स्पष्ट झाल्यामुळे हा निर्णय घेण्यात आला आहे.   विदेश अभ्यास दौऱ्यासाठी सर्व जिल्ह्यांना प्राधान्य देण्यात आले आहे. शेतकऱ्यांकडील पासपोर्ट, सातबारा तसेच अत्यावश्यक कागदपत्रांची छाननी करून प्रतीक्षा यादी तयार करण्यात आली आहे. काही शेतकरी अचानक दौऱ्यासाठी नकार देतात. अशा वेळी यादीतील क्रमाने खालच्या शेतकऱ्याला संधी दिली जाते.  यापूर्वी विदेश अभ्यास दौऱ्यासाठी केवळ अर्ज मागविले जात होते. मात्र, दौरे काढले जात नसल्याने अर्जदार शेतकरी नाराज होते. यंदा प्रथमच इस्त्राईलमध्ये दौरा काढण्यात आला. तथापि, एक शेतकरी आजारी पडल्यामुळे इस्त्राईलमध्ये अडकून पडला. यामुळे कृषी खात्याने पुढील दौऱ्याच्या रचनेत काही धोरणात्मक बदल करण्याचा निर्णय घेतला आहे. आधीच्या यादीतील शेतकऱ्यांना संधी मिळाल्याशिवाय नवी यादी तयार करण्याचे कृषी आयुक्तालयाने ठरविले आहे.   परिपूर्ण आरोग्य विमा देणार  “विदेश दौऱ्यात सहभागी झालेल्या शेतकऱ्याला परिपूर्ण आरोग्य विमा मिळवून देण्याचा आमचा प्रयत्न राहील. इस्त्राईलच्या अलीकडच्या दौऱ्यात परिपूर्ण विमा नसल्यामुळे अडकून पडलेल्या शेतकऱ्याला मायदेशी आणण्यासाठी मोठी कसरत कृषी विभागाला करावी लागली. यामुळे हा निर्णय घेण्यात आला आहे,’’ असे सूत्रांनी स्पष्ट केले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com