यवतमाळ : कृषी राज्यमंत्री सदाशिव खोत यांच्या दौऱ्यात कृषी विभागाची अकार्यक्षमता आणि खोटारडेपणा चव्हाट्यावर आला. सर्व माहिती घेतल्यावर कृषी सहायक, उपविभागीय कृषी अधिकारी, ग्रामविकास अधिकारी, महसूल निरीक्षक या सर्वांना कारणे दाखवा नोटीस बजाविण्याचे आदेश त्या त्या खात्याच्या वरिष्ठांना त्यांनी दिले आहेत.
दीपक मडावी या शेतकऱ्याचा मृत्यू विषबाधेने झाला होता. त्याच्या कुटुंबीयांचे सांत्वन खोत यांनी केले. सुरक्षात्मक उपाययोजना दुर्लक्षित केल्याची बाब या वेळी त्या कुटुंबीयांनी मान्य केली. दरम्यान, कृषी सहायक गावात येऊन मार्गदर्शन करतो का, असा प्रश्‍न उपस्थित केल्यावर काहींनी होकार दिला.
त्यावर रोजनिशी दाखविण्याचे सांगितल्यावर कृषी सहायक महेश चोडे निरुत्तर झाले. प्रभारी उपविभागीय कृषी अधिकारी आर. एस. पसलवाड यांची देखील अवस्था तशीच झाली. ग्रामपंचायत कार्यालयात कृषी सहायक येत असल्याची नोंद आहे का, असे ग्रामसेवकाला विचारल्यावर त्याने त्यासाठी कोणतेच रजिस्टरच नसल्याचे सांगितले. त्यामुळे तेथून उठून श्री. खोत यांनी थेट गावातील काही व्यक्‍तींशी संवाद साधला.
त्यातून कृषी सहायक गावात येतच नसल्याचे कळाल्यानंतर त्यांनी कृषी सहायक, उपविभागीय कृषी अधिकारी, ग्रामविकास अधिकारी, महसूल निरीक्षक या सर्वांना कारणे दाखवा नोटीस बजावण्याचे आदेश त्या त्या खात्याच्या वरिष्ठांना दिले. विशेष म्हणजे हंगामापूर्वी कीडनाशक फवारणीविषयक मार्गदर्शन करण्याची गरज असताना आता 18 बळी गेल्यावर कृषी विभाग याविषयी भिंत्तिपत्रके छापून जागृती करीत असल्याचेही या ग्रामस्थांनी सांगितले.
कपाशीची केली पाहणी सेंदूरशनी गावातील भाऊसाहेब वानखडे यांच्या कपाशी पिकाची सदाभाऊ खोत यांनी पाहणी केली. कीड-रोगावर प्रतिबंधात्मक उपाय म्हणून आपण आजवर चार फवारण्या केल्याचे त्यांनी सांगितले. 30 रुपये प्रति पंप अशी मजुरी दिली जाते आणि फवारणी करणारे मजूर गावात ठराविक असल्याचे त्यांनी सांगितले. सुरक्षात्मक उपाययोजना ते अवलंबीतात की नाही हे शेतीमाल तपासत नाही. औषधी आणून देणे आणि ती योग्य मात्रेत प्रति पंप असावी, हेच आम्ही तपासतो, असे शेतकरी वानखडे यांनी सांगितले.
रक्‍त आणि लघवी तपासणीचे आकारले पैसे विषबाधेमुळे उपचार घेत असलेल्या रुग्णांची रक्‍त आणि लघवी तपासण्याची सुविधा शासकीय रुग्णालयात नाही. त्यामुळे या रुग्णांना खासगीतून या चाचण्या कराव्या लागत आहे. तुमच्या तुटपुंज्या मदतीची मेल्यानंतर भीक नको, पण निदान इलाजात तर मदत करा, असे त्या महिलेने सांगितले. या प्रश्‍नाचे उत्तरदेखील सदाभाऊंना देता आले नाही.
साहेब, आमच्या जिल्ह्यात मरण स्वस्त हाये का? मुंबईत रेल्वे पुलावर मरणाऱ्याला पाच लाखांची मदत त मग यवतमाळात मरणाऱ्याला दोन लाख रुपयांचीच मदत का? म्हणून आम्हाले ती भीक नको ! साहेब, आमच्या जिल्ह्यात मरण स्वस्त हाये का, अशा शब्दांत रुग्णालयात विषबाधेवरील उपचारासाठी दाखल रुग्णाच्या महिला नातेवाइकांनी अशी विचारणा केल्यावर कृषी राज्यमंत्री निरुत्तर झाले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.