कांदा संचालनालयाला राष्ट्रीय संस्थेचा दर्जा

पुणे : राजगुरुनगर भागात असलेल्या कांदा, लसूण संशोधन संचालनालयाचे रूपांतर राष्ट्रीय संशोधन संस्थेत (एनआरसी) करण्याचा निर्णय घेण्यात आला आहे. यामुळे संशोधनाला चालना आणि शास्त्रज्ञांच्या संख्येत वाढ होणार आहे.  चीननंतर जगात सर्वांत जास्त कांदा भारतात पिकवला जातो. साडेनऊ लाख हेक्टरवर अंदाजे १६३ लाख टन कांदा उत्पादन करणाऱ्या भारतात कांदा उत्पादक भाग वाढतो आहे. चीनच्या तुलनेत प्रतिहेक्टरी कांदा उत्पादकता मात्र कमी आहे. त्यासाठी नाशिकचे एनएचआरडीएफ आणि राजगुरुनगरचे कांदा संचालनालय सातत्याने संशोधन करते आहे.  “संचालनालयाचे रूपांतर राष्ट्रीय संशोधन संस्थेत करण्याचा निर्णय तत्त्वतः झालेला आहे. भारतीय कृषी संशोधन परिषदेच्या (आयसीएआर) वार्षिक सभेत या निर्णयावर शिक्कामोर्तब केले जाईल. त्यानंतर परिषदेचे अध्यक्ष तथा केंद्रीय कृषिमंत्र्यांच्या स्वाक्षरीने या निर्णयाला अंतिम रूप मिळेल, अशी माहिती सूत्रांनी दिली. “भारतीय कांदा उत्पादनाचे माहेरघर असलेल्या नाशिकमध्येच कांदा संशोधन केंद्र स्थापन झाले होते. मात्र, केंद्राला जागा देण्यास नाशिकमध्येच विरोध झाला. त्यामुळे राजगुरुनगरला केंद्र स्थलांतरित करावे लागले. २००८ मध्ये या केंद्राला संचालनालयाचा दर्जा मिळाला, असेही सूत्रांनी स्पष्ट केले.  कांदा संचालनालयात सध्या १८ शास्त्रज्ञ आहेत. संशोधन संस्थेचा दर्जा मिळाल्यानंतर शास्त्रज्ञांसह इतर कर्मचारी वर्ग वाढेल. संशोधनाचा वेग देखील त्यामुळे वाढणार आहे.  कांदा लसूण संशोधन संचालनालायाचे संचालक मेजरसिंग यांच्या मते,  २००१ पासून कांदा उत्पादनात मोठी वाढ झाली. उत्पादकता दुपटीने वाढली आहे. ठिबकवरील उत्पादन तंत्र तसेच गुणवत्ता व उत्पादकता वाढीवर यापुढे भर दिला जाणार आहे.