नाशिक जिल्ह्यात पाणीटंचाईग्रस्त गावांची संख्या वाढली

नाशिक : मॉन्सूनचे आगमन होऊनही नाशिक विभागातील टंचाईग्रस्त गावांची संख्या कमी होण्याऐवजी आणखी वाढली आहे. जूनच्या दुसऱ्या आठवड्यातही विभागातील ३१६ गावे आणि ३५८ वाड्यांवरील ५ लाख ९२ हजार ५६३ नागरिकांची तहान भागविण्यासाठी प्रशासनाकडून २६४ टॅंकरद्वारे पिण्याच्या पाण्याचा पुरवठा सुरू आहे.

यंदा मॉन्सूनचे वेळेवर आगमन झाल्याने टंचाईग्रस्त गावांतील नागरिकांसह प्रशासनाच्या आशा पल्लवित झाल्या होत्या. मात्र नाशिक विभागात अद्यापही जोरदार पावसाची प्रतीक्षा कायम आहे. विभागात यंदा पाणीटंचाईनेही कळस गाठला होता. पावसाच्या सरींनंतर पाणीटंचाईची धग कमी होण्याची शक्‍यता होती. मात्र विभागाला या सरींनी हुलकावणी दिल्याने विभागातील पाणीटंचाई ‘जैसे थे’ आहे. जूनच्या दुसऱ्या आठवड्यात टंचाईग्रस्त गावांची संख्या कमी होण्याऐवजी उलट वाढली आहे.

विभागातील जळगाव जिल्ह्यात सर्वांत जास्त १३९ टंचाईग्रस्त गावे असून, या जिल्ह्यात तब्बल २ लाख ५९ हजार ७७ नागरिकांना पाणीटंचाईचा सामना करावा लागत आहे. त्या खालोखाल नाशिक जिल्ह्यातील १०३ टंचाईग्रस्त गावांतील १ लाख ८२ हजार ३२९ नागरिकांची तहान भागविण्यासाठी ७७ टॅंकरद्वारे पाणीपुरवठा सुरू आहे.

नगर जिल्ह्यातही ५४ टंचाईग्रस्त गावांतील १ लाख १३ हजार ७०१ नागरिकांना ६२ टॅंकर्सद्वारे पाणीपुरवठा होत आहे. धुळे जिल्ह्यातील १८ गावातील ३७ हजार ७६, तर नंदुरबार जिल्ह्यातील २ गावांतील ३८० नागरिकांना टॅंकर्सद्वारे पिण्याचे पाणी पुरविले जात आहे.

पाणीटंचाईची तीव्रता जास्त असणारे तालुके व गावे नाशिक : बागलाण (२१), येवला (४२), सिन्नर (१२), मालेगाव (८) धुळे : शिंदखेडा (१०) जळगाव : अमळनेर (४८), जामनेर (३४), पारोळा (२७), चाळीसगाव (११) नगर : संगमनेर (२१), पारनेर (१०), पाथर्डी (९)

विभागातील टंचाईस्थिती