एकलहरे वीज केंद्रात उभारली रोपवाटिका

नाशिक : पर्यावरणाचा समतोल राखण्यासाठी यावर्षी जुलै महिन्यात वृक्षारोपण करण्यात येईल. या पार्श्वभूमीवर नाशिक औष्णिक विद्युत केंद्रातील रोपवाटिकेत सुमारे सोळा हजार रोपे तयार करण्यात आली आहेत. या केंद्रात प्लॅस्टिकमुक्त केंद्र, शून्य कचरा प्रकल्प, शून्य गळती प्रकल्प, ऊर्जा व जलसंवर्धन असे अनेक उपक्रम राबविण्यात आले आहेत.

एकलहरे येथे केंद्रातील अधिकारी व कर्मचाऱ्यांनी हजारो झाडे लावून मोठी हिरवळ निर्माण केली आहे. सर्व अधिकारी व कर्मचाऱ्यांनी विविध फळांच्या बिया गोळा केल्या. त्यापासून रोपे तयार करण्यात आली. 

ही रोपवाटिका मुख्य अभियंता उमाकांत निखारे, स्थापत्य विभागाचे अधीक्षक अभियंता मनोहर तायडे यांच्या मार्गदर्शनाखाली साकार झाली. यासाठी विवेक मोरे, प्राजक्ता घुले, सोमदत्त साठे, हरिष आहेर, संतोष येवले यांनी विशेष परिश्रम घेतले.

तयार केलेली रोपे या रोपवाटिकेमध्ये शेवगा ७९८६, विलायती चिंच १४१०, आंबा १८०, फणस १७३०, सीताफळ ७००, करंज १०६०, आंबट चिंच १५८०, जांभूळ ८००, इतर (बेल, बेहड, वड) ३००, गुलमोहर ६००, बहावा १५० अशी एकूण - १६४९६ रोपे तयार केली आहेत.