जळगावात भरडधान्य खरेदी केंद्रांवरही नियमांचा अडथळा

जळगावात भरडधान्य खरेदी केंद्रांवरही नियमांचा अडथळा
जळगावात भरडधान्य खरेदी केंद्रांवरही नियमांचा अडथळा

जळगाव  ः जिल्ह्यात भरडधान्य खरेदी केंद्र आठ दिवसांपूर्वी सुरू केले; मात्र खरेदीत ॲपद्वारे नोंदणीच्या अडचणी, गोदामे उपलब्ध न होणे अशा अनेक समस्या येत आहेत. त्यामुळे या केंद्रांवर अद्याप एक दाणाही धान्य खरेदी होऊ शकलेली नाही.  जिल्ह्यात मागील महिन्यात १५ भरडधान्य खरेदी केंद्रे मार्केटिंग फेडरेशनने सुरू केली; पण यापैकी एकाही केंद्रावर एक दाणाही आठवडाभरात आला नाही. संबंधित तालुक्‍यांमधील सहकारी शेतकरी खरेदी विक्री संघ सबएजंट म्हणून हे केंद्रे चालवत आहेत.  केंद्रात ऑनलाइन नोंदणीशिवाय शेतमाल खरेदी होणार नाही. या नोंदणीसाठी संबंधित केंद्रातील व्यवस्थापकांच्या स्मार्ट फोनमध्ये नोंदणी ॲप डाउनलोड करायचे आहे. एका खासगी कंपनीने ते ॲप दिले असून, ते मागील आठवड्यात अनेक व्यवस्थापकांनी डाउनलोड केले. सोमवारीही (ता. ६) त्यासंबंधीचे कामकाज काही ठिकाणी सुरू होते. हे ॲप हाताळणीबाबत व्यवस्थापकांना अडचणी येतात. अनेक जण तंत्रस्नेही (टेक्‍नोसॅव्ही) नसल्याने अडचणी अधिक आहेत. त्यामुळे नोंदणी करता येत नाही. जे शेतकरी येतात, त्यांना परतावून लावले जात असल्याची माहिती मिळाली. गोदामांची अडचण खरेदी केंद्रात येणारा माल साठवणुकीसाठी वखार महामंडळ व इतर सहकारी संस्थांची गोदामे काही शेतकरी संघांना अजूनही उपलब्ध झालेली नाही. जळगाव, चोपडा येथेही समस्या आहेत. संबंधित तालुका तहसील प्रशासनाकडून ही गोदामे उपलब्ध करून घेण्याचे आदेश मार्केटिंग फेडरेशनने दिले आहेत. गोदामे नसल्याने काही ठिकाणी खरेदी सुरू झालेली नसल्याचे सांगण्यात आले.  एफएक्‍यूचा जाच शेतमालात १४ टक्‍क्‍यांपेक्षा अधिक आर्द्रता नको, माती, कचरा नको, अशा अनेक अटी दर्जेदार (एफएक्‍यू) मालासंबंधी केंद्रांवर आहेत. असा माल शेतकऱ्यांकडे यंदा फारसा नाही. अर्थातच पाऊस नव्हता तेव्हा व नंतर परतीच्या पावसात ज्वारी, बाजरीला फटका बसला. तसेच माल विक्रीपूर्वी नोंदणी करताना आधार क्रमांक, बॅंक खाते क्रमांक, पॅन कार्ड, मोबाईल क्रमांक मागितला जात आहे. अनेक वृद्ध शेतकऱ्यांचे आधार क्रमांक लिंक होत नसल्याने अडचणी अधिकच्या येत असल्याचे शेतकऱ्यांचे म्हणणे आहे. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com