आॅनलाइन तूर नोंदणीच्या कामात अडथळे

परभणी : आधारभूत किंमत खरेदी योजनेअंतर्गत तूर नोंदणीसाठी संकेतस्थळ बंद राहू लागल्याने अडथळे येत आहेत. नोंदणीचे काम गतीने होत नाही. शुक्रवार(ता. १२)पर्यंत नांदेड जिल्ह्यात तीन हजार शेतकऱ्यांची नोंदणी झाली असून परभणी, हिंगोली जिल्ह्यांत नोंदणीस सुरवात झाली. कृषी विभागाकडून यंदाच्या हंगामातील हेक्टरी तूर उत्पादकतेची माहिती उपलब्ध झालेली नाही, तसेच खरेदीचे आदेशही प्राप्त झाले नाहीत. त्यामुळे खरेदी केंद्र कार्यान्वित झाले नाहीत. परंतु नवीन तुरीची आवक सुरू झाली असून खुल्या बाजारामध्ये आधारभूत किमतीपेक्षा १००० ते २००० रुपये कमी दराने खरेदी करून व्यापारी लूट करत असल्यामुळे शेतकऱ्यांना मोठा आर्थिक फटका सोसावा लागत आहे. आधारभूत किंमत खरेदी योजनेअंतर्गत शासकीय खरेदी केंद्रांवर तूर आणण्यापूर्वी आॅनलाइन नोंदणी करणे अनिवार्य करण्यात आले आहे.  नांदेड जिल्ह्यातील देगलूर, मुखेड, बिलोली, धर्माबाद, नांदेड, लोहा, भोकर, हदगाव येथे खरेदी विक्री संघामार्फत नायगाव आणि किनवट येथे बाजार समितीमार्फत नोंदणी सुरू आहे. शुक्रवार(ता. १२)पर्यंत तीन हजार शेतकऱ्यांनी नोंदणी केली.  परभणी जिल्ह्यातील परभणी, जिंतूर, बोरी, सेलू, मानवत, गंगाखेड, पूर्णा या सात ठिकाणी, हिंगोली जिल्ह्यातील हिंगोली, वसमत, जवळा बाजार, कळमनुरी, सेनगाव या पाच ठिकाणी तूर खरेदीसाठी आॅनलाइन नोंदणी सुरू आहे. सर्व्हर डाऊन होत असल्यामुळे शेतकऱ्यांची माहिती अपलोड करण्यासाठी वेळ लागत आहे. संकेतस्थळ वारंवार बंद राहू लागल्याने नोंदणीच्या कामास विलंब लागत आहे. आधारभूत किंमत प्रतिक्विंटल ५ हजार ४५० रुपये असताना व्यापारी मात्र ३ हजार ५०० ते ४४०० रुपये प्रतिक्विंटल दराने खरेदी करत आहेत. सध्या खुल्या बाजारात लाल तुरीची ३ हजार ९०० ते ४ हजार ४०० रुपये, पांढऱ्या तुरीची ३ हजार ९५० रुपये ते ४ हजार ३८० रुपये, काळ्या तुरीची ३ हजार ५५० रुपये दराने खरेदी केली जात आहे. नाफेडचे तूर खरेदी केंद्र सुरू नाहीत.