पीकपेरा नोंदीसाठी तलाठ्यांकडून अडवणूक

जळगाव ः शासनाने हमीभावात कडधान्य खरेदीसंबंधी कार्यवाही सुरू केल्याने शेतकऱ्यांना नोंदणीसाठी मूग, उडीद पिकाच्या नोंदीचा सातबारा अत्यावश्‍यक आहे. परंतु हे सातबारा उतारे देण्यास तलाठी टाळाटाळ करीत आहे. प्रथम थेट शेतात जाऊन पाहणी करेल, मग उडीद, मूग पिकाची नोंद करून सातबारा देईन, अशी अडवणूक तलाठी करू लागले आहेत. अमळनेर (जि. जळगाव) तालुक्‍यातील करणखेडा येथील शरद धनगर यांना असाच अनुभव आला असून, त्यांनी या संदर्भात ॲग्रोवनकडे तलाठ्याकडून झालेल्या अडवणुकीची आपबिती सांगितली.  शरद यांनी दोन एकरांत मुगाची पेरणी केली होती. तसेच काही क्षेत्रात आंतरपीक म्हणूनही मुगाचे पीक घेतले आहे. आता शासकीय कडधान्य खरेदी पुढील महिन्यात सुरू होईल. या केंद्रात धान्य विक्रीसाठी संबंधित केंद्रात नोंदणी बंधनकारक आहे. त्यासाठी फक्त ९ ऑक्‍टोबरपर्यंतची मुदत आहे. या केंद्रात मुगाच्या विक्रीसंबंधी मूग पिकाची नोंद असलेला सातबारा आवश्‍यक असून, त्यासाठी शरद यांनी आपल्याशी संबंधित तलाठी कार्यालयात संपर्क साधला. परंतु तलाठी रजेवर आहे. अधिकची चौकशी केली असता नंदगाव (ता. अमळनेर) येथील तलाठी यांच्याकडे करणखेडा व काही गावांचा प्रभार आहे. मग नंदगाव येथील तलाठी यांच्याकडे मूग पिकाची नोंद असलेल्या सातबाऱ्याची मागणी त्यांनी केली. परंतु तलाठी यांनी प्रत्यक्ष शेतात पाहणी करील. मूग पीक घेतल्याची खात्री झाल्यानंतरच सातबारा देईन, असे सांगितले. पण ही पाहणी केव्हा करील, हे मात्र तलाठी यांनी सांगितलेले नाही.  ९ ऑक्‍टोबरपूर्वी ही पाहणी झाली नाही तर शासकीय खरेदी केंद्रात मूग विक्रीसंबंधी नोंदणी करता येणार नाही. मग मूग पडून राहील. नुकसान होईल. एकामागून एक दिवस जात आहे. ३० सप्टेंबरला रविवार आहे. मग २ ऑक्‍टोबरला गांधी जयंतीची सुटी  राहील.  तलाठी यांनी पाहणी करावी, पण तातडीने कार्यवाही करायला हवी आणि लागलीच सातबारा उतारा द्यावा. एकाच तलाठ्याकडे सात-आठ गावांचा प्रभार आहे. त्यात अशी अडवणूक केली जात असल्याने शासकीय खरेदी केंद्रात नोंदणी कशी करता येईल, असा प्रश्‍नही शरद यांनी ॲग्रोवनशी बोलताना उपस्थित केला.