बाजरी पिकाला फटका
बाजरी पिकाला फटका

जळगाव जिल्ह्यात हवामानाचा बाजरी उगवणीवर परिणाम

जळगाव  ः जिल्ह्यात बाजरीची पेरणी काही भागांचा अपवाद वगळता पूर्ण झाली आहे. परंतु यंदाच्या विषम वातावरणाचा फटका बाजरीला बसला असून, अनेक ठिकाणी पिकात तूट आली आहे. यामुळे उत्पादनात मोठी घट येईल, असे शेतकऱ्यांचे म्हणणे आहे.

यंदा अनेक शेतकऱ्यांनी कापसाचे पीक काढून क्षेत्र रिकामे केले. ते सुमारे महिनाभर रिकामे ठेवले आणि जानेवारीच्या अखेरीस बाजरीची पेरणी केली. काही शेतकऱ्यांनी २० ते २५ जानेवारीदरम्यानही पेरणी केली. जानेवारी महिन्याच्या मध्यात व शेवटच्या टप्प्यात ज्या बाजरीची पेरणी झाली, तिच्या उगवणीवर अनेक ठिकाणी परिणाम झाल्याचे चित्र आहे. काही शेतकऱ्यांचे पीक तर फक्त ३० ते ३५ टक्केच उगवले आहे. यामुळे पीक मोडण्याची वेळही आली.

जिल्ह्यात चोपडा, चाळीसगाव, पारोळा, पाचोरा, जामनेर, भडगाव या भागांत बाजरीची पेरणी अधिक झाली आहे. पेरणी यंदा बऱ्यापैकी झाली. कारण कापसाचे पीक गुलाबी बोंड अळीने काढण्याची प्रक्रिया डिसेंबर व जानेवारी महिन्यांत अनेक शेतकऱ्यांनी केली. हरभरा व गहू पेरणीऐवजी शेतकऱ्यांनी बाजरीला पसंती दिली. ज्या कापसाच्या क्षेत्रात ठिबक यंत्रणा होती, त्या क्षेत्रात ठिबक यंत्रणा तशीच ठेऊन ठिबकद्वारे बाजरीचे सिंचन केले.

बाजरीच्या पिकाला किमान तापमान १५ ते १७ अंश सेल्सिअस पुढे हवे असते, परंतु मागील महिनाभरात १५ अंश सेल्सिअसपेक्षा अधिक तापमान झालेच नाही. यातच २८ जानेवारी ते १३ फेब्रुवारी यादरम्यान ढगाळ वातावरण होते. दिवसाही आर्द्रतायुक्त थंड वारे वाहत होते. हवी तशी उष्णता बाजरीच्या पेरलेल्या बियाण्याला मिळाली नाही.

हवामान प्रतिकूल असल्याने बाजरीची ८० टक्के उगवणशक्ती मिळविणे शेतकऱ्यांना अशक्‍य झाले. काळ्या कसदार जमिनीत उगवणीवर अधिकचा परिणाम झालेला आहे, असे शेतकरी मंगल पाटील (वडनगरी, जि. जळगाव) यांनी म्हटले आहे.

बाजरीच्या पिकाबाबत असमाधानकारक स्थिती असल्याने शेतकऱ्यांच्या पदरी पुन्हा एकदा निराशाच पडली आहे. काही शेतकऱ्यांनी पिकात तूट आलेली असतानाही ते तसेच ठेवले असून, जे धान्य व चारा मिळेल, त्यावर समाधान मानन्याशिवाय त्यांच्यासमोर पर्याय नाही, अशी स्थिती आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com