ठिबकचे अनुदान वाटपासाठी अधिकाऱ्यांची धावपळ सुरू

पुणे ः शासनाकडून ठिंबक सिंचनासाठी तरतूद केलेली रक्कम खर्च करण्याचे अवघे बारा दिवस बाकी आहे. या वर्षात कृषी विभागाकडून पंतप्रधान सूक्ष्म सिंचन योजनेसाठी उपलब्ध झालेला निधी खर्च करण्याचे मोठे आव्हान समोर उभे राहिले आहे. त्यामुळे कृषी विभागाकडून पुणे विभागासाठी उपलब्ध झालेला ५९ कोटी ४० लाख रुपयांचा निधी खर्च करण्यासाठी अधिकाऱ्यांची धावपळ सुरू झाली आहे. 

यंदा ठिंबक सिंचनासाठी पुणे विभागातून ४४ हजार ६५० अर्ज दाखल झाले आहेत. १५ मार्च ही अंतिम मुदत असल्याने मोठ्या प्रमाणात अर्ज दाखल झाले आहेत. त्यासाठी केंद्र व राज्य शासनाकडून पुणे विभागासाठी ५९ कोटी ४० लाख रुपयांचा निधी उपलब्ध झाला आहे. सध्या आलेल्या अर्जापैकी ३२ हजार १९२ अर्जाची छाननी करण्यात आली आहे. तर ३१ हजार ९२१ लाभार्थ्यांना पूर्वसंमती देण्यात आली असून आत्तापर्यंत २० हजार १७४ लाभार्थ्यांनी ठिंबक सिचनाचे संच बसविलेले आहे. तर ९ हजार ९८१ लाभार्थ्यांच्या संच बसविल्याची मोका तपासणी केली आहे. आतापर्यंत एकूण आठ हजार ८२ लाभार्थ्यांना अनुदान देण्याच्या सूचना देत अवघ्या सात हजार ५४३ लाभार्थ्यांना १४ कोटी ६० हजार रुपयांचे वाटप केले आहे. 

मागील वर्षी एक एप्रिलपासून ऑनलाईन अर्ज करण्यास सुरवात झाली होती. त्यानंतर कृषी विभागाकडे दाखल झालेल्या लाभार्थ्यांना अनुदान देण्यासाठी मोठ्या प्रमाणात निधी उपलब्ध झाला नसल्याचे चित्र होते. मात्र, चालू आर्थिक वर्षात तरतूद केलेली रक्कम खर्च करण्याची वेळ एक ते दीड महिन्यावर येऊन ठेपल्यानंतर शासनाकडून निधी उपलब्ध करून देण्यास सुरवात झाली. दहा महिन्यात कृषी विभागाकडे उपलब्ध झालेल्या निधीपैकी अवघे ८६ लाख ९३ हजार रूपयांच्या अनुदानाचे वाटप शेतकऱ्यांना झाले होते.