जत तालुक्यातील दीड हजार शेततळी कोरडी

सांगली :  शासनाच्या योजनेतून जत तालुक्यात सुमारे अडीच हजारांहून शेततळी झाली आहेत. ती पिकासाठी वरदान ठरताहेत. पण पाऊस नाही, योजनेचे पाणी नाही. त्यामुळे अडीच हजारांपैकी तब्बल दीड हजाराहून अधिक शेततळी कोरडी आहेत. परिणामी, शाश्वत पाण्याची सोय होत नसल्याने डाळिंब आणि द्राक्ष बागायतदार शेतकऱ्यांमध्ये चिंता आहे.

कृषी विभागाने मागेल त्याला शेततळे योजना दुष्काळी भागात प्रभावीपणे राबविली. प्रामुख्याने द्राक्ष आणि डाळिंब उत्पादक शेतकऱ्यांनी याचा लाभ घेतला. तालुक्यात डाळिंबाचे क्षेत्र सहा हजार हेक्टर, तर द्राक्षाचे क्षेत्र सात हजार हेक्टर आहे. द्राक्ष आणि डाळिंब उत्पादकांना शेततळ्यामुळे शाश्वत पाण्याची सोय करता येत आहे. टंचाईच्या काळात परिसरातून पाणी टॅंकरने आणून शेततळ्यात साठवणूक केली जाते. गरजेनुसार शेततळ्यातील पाणी शेतीला देण्याचे नियोजन इथला शेतकरी करीत असल्याचे चित्र आहे.

जत तालुक्यातील वार्षिक पर्जन्यमान सरासरी ४५० मिलिमीटर आहे. परंतु, गेल्या दहा वर्षांत या तालुक्‍याने पावसाची सरासरीसुद्धा ओलांडली नाही. गतवर्षी तालुक्‍यात अवघा २४९.५० मिलिमीटर पाऊस झाला. २०१७ ते २०१८ या पर्जन्यमान सालात तो ३०२ मिलिमीटर झाला. परिमाणी १२३ गावांत पाणीपातळी तीन मीटरने घटली. यामुळे पाणी कुठून आणायचे, असा प्रश्न शेतकऱ्यांना पडला आहे. म्हैसाळ योजनेचे पाणी तालुक्यात पोचले, परंतु पूर्व भागात ते पोचले नाही. त्यामुळे ज्याठिकाणी म्हैसाळचे पाणी आहे, त्या ठिकाणच्या शेतकऱ्यांनी शेततळे भरून पाण्याची सोय केली आहे.

डाळिंब, द्राक्षाची छाटणी रखडली

जत पूर्व भागातील शेतकऱ्यांना पाण्यासाठी तीस ते चाळीस किलोमीटरपर्यंत जावे लागते. बारा हजार लिटरच्या टॅंकरला पाच हजार रुपये मोजावे लागतात. पैसे देऊनही पाणी मिळत नाही. त्यामुळे शेततळ्यांत पाणी कसे येणार, हा प्रश्न आहे. परिमाणी, डाळिंब आणि द्राक्ष बागांची छाटणी रखडल्याचे चित्र आहे.