खरेदी न झालेल्या हरभरा, तुरीसाठी हजाराचे अनुदान

सोलापूर : हमीभाव योजनेतून शेतकऱ्यांनी हरभरा व तूर विक्रीसाठी एनईएमएल पोर्टलवर नोंदणी केली, परंतु त्या शेतकऱ्यांचा हरभरा व तूर खरेदी झाली नाही, अशा शेतकऱ्यांना प्रतिक्विंटल एक हजार रुपये अनुदान देण्यात येणार आहे. या अनुदानाची रक्कम सहकार विभागाच्या वतीने ४८० कोटी रुपयांची हमी शासनाने घेतली आहे. ही रक्‍कम खर्च करण्याची जबाबदारी पणन महासंघावर सोपविण्यात आली आहे.  २०१७-१८ मध्ये ज्या शेतकऱ्यांकडून तूर व हरभरा खरेदी करता आला नाही, अशा नोंदणीकृत शेतकऱ्यांना प्रतिहेक्‍टर १० क्विंटलला अनुदान मिळणार आहे. जास्तीत जास्त दोन हेक्‍टरला हे अनुदान देण्यात येणार आहे. ज्या शेतकऱ्यांना खरेदीबाबत एसएमएस पाठविण्यात आला होता, त्या शेतकऱ्यांनी शेतीमाल विक्रीसाठी आणला नाही, अशा शेतकऱ्यांना या अनुदान योजनेच्या लाभासाठी अपात्र ठरविण्यात येणार आहे. नोंदणी केलेल्या ज्या शेतकऱ्यांना शेतीमाल आणण्यासाठी एसएमएसच पाठविण्यात आलेला नाही, असे शेतकरी मात्र या योजनेच्या लाभासाठी पात्र ठरविण्यात येणार आहेत. या योजनेचा लाभ देताना शेतकऱ्यांच्या ज्या बॅंक खात्याला आधारची जोडणी केली आहे, त्याच खात्यावर ही रक्कम अदा केली जाणार आहे.  शासनाने राष्ट्रीयीकृत बॅंकांना दिलेल्या ४८० कोटी रुपयांच्या कर्ज हमीतून कर्ज घेऊन ही रक्कम शेतकऱ्यांना अनुदानापोटी वितरित केली जाणार आहे. या कर्जाचे व्याज राज्य सरकारच्या वतीने दिले जाणार आहे. शेतकऱ्यांना अनुदान देण्याबाबत राज्य मंत्रिमंडळाच्या बैठकीत मान्यता देण्यात आली होती. त्यानंतर या योजनेचे निकष व नियम ठरविण्यात आले आहेत.