नाशिकला कांदा १८०० ते २५०० रुपयांवर

नाशिक : नाशिक जिल्ह्यात गत सप्ताहात प्रतिदिनी सरासरी १ लाख क्विंटल कांद्याची आवक झाली. या वेळी कांद्याला क्विंटलला १८०० ते २५०० व सरासरी २००० रुपये दर मिळाले. जानेवारीच्या पहिल्या आठवड्यात कांद्याचे दर प्रतिक्विंटल जास्तीत जास्त ३५०० पर्यंत होते. देशभरातून विशेषत: महाराष्ट्र व गुजरात राज्यांतून कांद्याची आवक वाढत असताना त्याचा दरावर परिणाम झाला. दरम्यान गत सप्ताहात कांद्याचे दर १८०० ते २५०० या दरम्यान स्थिरावले.  नाशिक जिल्ह्यातील कांद्याच्या १५ बाजार समित्या व ४५ उपबाजारांतून गत सप्ताहात दिवसाला सरासरी १ लाख क्विंटल कांद्याची आवक झाली. यंदाच्या वर्षाअखेर कांद्याचे देशातील उत्पादन हे २३० लाख टनांपेक्षा जास्त होण्याचा तज्ज्ञांचा अंदाज आहे. देशाची एकूण गरज १५० लाख टनांची असताना अतिरिक्त होणाऱ्या उत्पादनामुळे दर खाली होण्याची भीतीही व्यक्त केली जात आहे. या स्थितीत उपलब्ध कांद्याचा देशांतर्गत तसेच देशाबाहेरील बाजारात निपटारा होणे गरजेचे असल्याचे बाजार समितीच्या सूत्रांनी सांगितले. डिसेंबर महिन्यात कांद्याचे किमान निर्यात मूल्य ८५० डॉलर करण्यात आल्याने निर्यात होणाऱ्या कांद्याच्या व्यापारात अडथळे निर्माण झाले. बहुतांश स्पर्धक कांदा उत्पादक देशांचे किमान निर्यात मूल्य हे २०० ते ४०० डॉलर असताना भारतीय कांद्याचे दुपटीने असलेले किमान निर्यात मूल्य हे आयातदारांना परवडणारे नव्हते. या स्थितीत त्याचा परिणाम जागतिक बाजारातील कांद्याच्या मागणीवर झाला. दरम्यान हे किमान निर्यातमूल्य हटवावे. कांदा निर्यात खुली करावी, अशी मागणी शेतकऱ्यांकडून होत होती. अखेर केंद्र शासनाच्या पातळीवर याबाबत हालचाली सुरू झाल्या. जानेवारी महिन्याच्या दुसऱ्या आठवड्यात एमईपी (किमान निर्यात मूल्य) दीडशे डॉलरने कमी झाली. मात्र त्याचा बाजारावर फार मोठा परिणाम झाला नाही. किमान निर्यात मूल्य संपूर्णपणे काढाणे गरजेचे आहे. तसे झाले तरच कांदा दरातील उतरण थांबेल, असे उमराणे ओनियन मर्चंट असोसिएशनचे अध्यक्ष खंडू देवरे यांनी सांगितले.