नाशिकमधील कांदा व्यवहार दिवाळीतही सुरू ठेवा

नाशिक ः दिवाळीमुळे व्यवहार बंद ठेवून शेतकरी व सामान्य नागरिकांची गैरसोय टाळण्यासाठी नियमितपणे कांद्याचे व्यवहार सुरू ठेवण्याचे आदेश जिल्हाधिकारी राधाकृष्णन बी. यांनी गुरुवारी (ता. १२) कांदा व्यापाऱ्यांना दिले.    मध्य प्रेदश व कर्नाटकचा कांदा पावसामुळे यंदाही खराब झाला आहे. त्यामुळे दिवाळीत नाशिकच्या कांद्याला चांगले दर मिळण्याची शक्‍यता आहे. याच काळात कांद्याचे व्यवहार बंद राहिले तर त्याचा अंतिमतः फटका कांदा उत्पादक शेतकऱ्यांनाच बसण्याची भीती आहे. बाजारात पुरेसा कांदा नसल्याने त्यातून कृत्रिम दरवाढीचा धोका असल्याने जिल्हाधिकारी राधाकृष्णन बी. यांनी जिल्ह्यातील कांदा व्यापाऱ्यांची तातडीची बैठक घेतली. जिल्हाधिकारी कार्यालयात सायंकाळी घेतलेल्या बैठकीत जिल्हाधिकाऱ्यांनी बाजार समित्या या काळातही उघड्या ठेवण्याचे आदेश दिले. चार दिवसांत आलेला माल वितरित करत रोजच्या कांद्याच्या साठ्याची माहिती प्रशासनाला सादर करण्याचे आदेश दिले. कांदा व्यापाऱ्यांनी त्यांच्या अडचणींचा पाढा वाचला. मात्र, शेतकरी हितासाठी या आदेशाचे पालन करावेच लागेल, असे त्यांनी स्पष्ट केले. या कालावधीत मजूर नसल्याने आलेला माल खरेदी किंवा विक्री करणे शक्‍य नाही. तसेच कांदा शेतकऱ्यांकडून घेतल्यानंतर ट्रक किंवा रेल्वे वॅगनद्वारे पाठविण्यासाठी, त्याची पॅकिंग करण्यासाठी आठवड्याचा कालावधी आवश्‍यक आहे. त्यामुळे ४८ तासांत तो पाठविणे अशक्‍य असल्याचे सांगत आठ दिवसांची मागणी केली. त्यावर जिल्हाधिकाऱ्यांनी चार दिवसांची मुदत दिली; पण या मुदतीत तुम्हाला विक्री करावी लागण्याचे स्पष्ट केले.  तांत्रिक कारणामुळे कांदा पाठविण्यात अडचणी आल्यास तशीही कारणे प्रशासनाला सांगावीत. कांद्यावरून शासनाकडून विचारणा झाल्यास त्याबाबत समर्पक उत्तरे देता येतील, हे त्यांनी स्पष्ट केले. व्यापाऱ्यांनी जिल्हाधिकाऱ्यांच्या सूचनेनुसार कार्यवाहीस सहमती दर्शविली.