‘नाफेड’चा साडेतेरा हजार टन कांदा जातोय दिल्ली, भुवनेश्वरला

नाशिक   : कांदा दरात स्थिरता यावी यासाठी नाफेडने एप्रिल ते ऑगस्ट २०१८ या कालावधीत खरेदी केलेला १३ हजार ५०० मेट्रिक टन कांदा आता आठ ते दहा दिवसांपासून दिल्ली, आझादनगर, भुवनेश्वर या ठिकाणी पाठवण्यात येत असल्याची माहिती ‘नाफेड’चे संचालक नानासाहेब पाटील यांनी दिली.

सहा महिन्यांपासून हा कांदा खरेदी होत आहे. त्यामध्ये दररोज होणाऱ्या वातावरणाच्या बदलामुळे १५ ते २० टक्‍क्‍यांपर्यंत घट आणि नुकसान होत आहे. ज्या वेळी संपूर्ण चाळीमधून कांदा बाहेर काढण्यात येईल त्या वेळीच नुकसानीची आकडेवारी समोर येईल, असेही पाटील यांनी स्पष्ट केले आहे.

कांदादरात चढ-उतार झाल्यानंतर दर समतोल ठेवण्यासाठी केंद्र सरकारच्या वतीने नाफेडमार्फत कांदा स्थिरीकरण फंड अंतर्गत कांदा खरेदी दरवर्षी करण्यात येते. या वर्षी २५ हजार मेट्रिक टन कांदा खरेदीचे उद्दिष्ट होते. त्यानुसार नाफेडने साडेतेरा हजार मेट्रिक टन कांदा खरेदी केला होता. तो आता विविध राज्यांत नाफेड तसेच इतर यंत्रणांमार्फत पाठवला जात आहे. कांद्याचे घसरते दर आटोक्‍यात राहावे व ग्राहकांना योग्य दरात कांदा उपलब्ध व्हावा, या हेतूने तसेच कांदा उत्पादकांना दिलासा देण्यासाठी केंद्र सरकारने नाफेडमार्फत किंमत स्थिरीकरण निधीच्या माध्यमातून २५ हजार मेट्रिक टन कांदा खरेदी करण्याचा निर्णय घेतला होता. त्यात आतापर्यंत तब्बल १३ कोटी रुपये खर्च करून १३ हजार ५०० मेट्रिक टन कांदा खरेदी करण्यात आला आहे.

शेतीमालाच्या दरातील घसरण रोखण्यासाठी केंद्र सरकारने डॉ. स्वामिनाथन आयोगाने सुचविलेल्या भाव स्थिरीकरण निधी योजनेसाठी मोठी आर्थिक तरतूद केली. त्यातून या वर्षी २५ हजार मेट्रिक टन कांदा खरेदीचे उद्दिष्ट आहे. घाऊक बाजारात भाव घसरू नयेत म्हणून नाशिक, नगर, पुणे जिल्ह्यांतील बाजार समित्यांमधून नाफेडने हा कांदा खरेदी केला आहे. केंद्र सरकारने नाफेडमार्फत खरेदी केलेला कांदा रवाना करण्यासाठी चाळीतून बाहेर काढला जात आहे. यातील वजनातील घट व हवामानाचा परिणाम यामुळे कांदा किती खराब निघतो हे लवकरच समजेल, असे श्री. पाटील यांनी सांगितले.