कांदा दर अजून सव्वा महिना टिकून राहतील !

कांदा दरात क्विंटलला 200 च्या दरम्यान काही कारणांनी फरक पडू शकतो. मात्र बहुतांशी व्यवहार व दर स्थिर राहतील अशीच स्थिती आहे. - बी. वाय. होळकर, सचिव, लासलगाव बाजार समिती
नाशिकमध्ये कांदा क्विंटलला 1200 ते 1700 रुपये
नाशिकमध्ये कांदा क्विंटलला 1200 ते 1700 रुपये

नाशिक : लासलगाव बाजार समितीत सोमवारी (ता.25) कांद्याला क्विंटलला 1200 ते 1700 व सरासरी 1500 रुपये दर मिळाले. हे दर अजून महिना, सव्वा महिना टिकून राहतील, असा अंदाज व्यापारी तसेच तज्ज्ञांमधूनही व्यक्त होत आहे. मागील चार दिवसांपासून लासलगाव सह नाशिक जिल्ह्यातील 15 बाजार समित्या व 45 उपबाजारात कांद्याच्या दराचे हेच चित्र आहे.

साठेबंदी तसेच व्यापाऱ्यांवरील प्राप्तिकराच्या धाडी यामुळे गत पंधरवड्याच्या सुरवातीला बाजारात गोंधळ झाला. चार दिवस बाजार बंद राहिले. गत सप्ताहाच्या सुरवातीपासून पुन्हा कांदा लिलाव पूर्ववत सुरू झाले. याचा परिणाम होऊन दरात लगेचच 300 रुपयांनी घट झाली होती. मात्र त्यानंतर चार दिवसांनी बाजाराने जोम धरला.

कांदा दर क्विंटलला 1200 ते 1700 व सरासरी 1500 रुपयांवर स्थिरावले आहेत. ज्येष्ठ व्यापारी निर्यातदार नंदकिशोर डागा म्हणाले की, मागील वर्षी लासलगाव बाजार समितीत 600 ते 700 नग कांदा आवक होत होती. यंदा त्यात 300 नगांनी वाढ झाली आहे. वाढलेली आवक, परराज्यातील खरेदीदारांकडून स्थिरावलेली मागणी आणि साठेबंदी, धाडी टाकून शासनाकडून होत असलेला दबाव यामुळे व्यापार अडचणीत आला आहे.

याही स्थितीत येत्या काळातील मार्केट स्थिर राहील असा अंदाज आहे. नोव्हेंबर महिन्यात नवीन लाल कांद्यांची आवक वाढल्यास त्याचा बाजारावर परिणाम होईल. मात्र ऑक्‍टोबर महिन्यात दर स्थिर राहतील अशीच स्थिती आहे. व्यापारी व शेतकरी यांच्याकडील उपलब्ध कांद्याची स्थिती पाहता येत्या काळात आवक घटण्याची शक्‍यता नाही. कांदा दरात क्विंटलला 200 च्या दरम्यान काही कारणांनी फरक पडू शकतो. मात्र बहुतांशी व्यवहार व दर स्थिर राहतील अशीच स्थिती असल्याचे लासलगाव बाजार समितीचे सचिव बी. वाय. होळकर यांनी स्पष्ट केले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com