ठिबक अनुदानासाठी ऑनलाइन नोंदणीला मुदतवाढ

पुणे : प्रधानमंत्री सूक्ष्म सिंचन योजनेसाठी निधी उपलब्ध असल्याने ऑनलाइन अर्ज नोंदणीसाठी शेतकऱ्यांना जादा कालावधी देण्यात आला आहे. त्यामुळे आता जानेवारीतदेखील ठिबक अनुदानासाठी ऑनलाइन अर्ज भरण्याची संधी शेतकऱ्यांना मिळते आहे.  ठिबकसाठी अल्प व अत्यल्प भूधारक शेतकऱ्याला यंदा ५५ टक्के तर इतर शेतकऱ्यांना सरसकट ४५ टक्के अनुदान दिले जात आहे. त्यानुसार आतापर्यंत डीबीटीच्या माध्यमातून १९९ कोटी रुपये बॅंक खात्यात वर्ग करण्यात आले आहेत. पुढील काही दिवसात अजून किमान दीडशे कोटी रुपये शेतकऱ्यांच्या खात्यात जमा होतील, अशी माहिती सूत्रांनी दिली. फलोत्पादन संचालक प्रल्हादराव पोकळे यांच्या मार्गदर्शनाखाली ठिबक अनुदान वितरणाचे राज्यभर नियोजन केले जात आहे. ''ऑनलाइन अर्जाची ‘विंडो’ यंदा एक मे २०१७ रोजी उघडण्यात आली होती. ३१ डिसेंबरपर्यंतच ही विंडो सुरू ठेवण्याचे शासनाने आधी निश्चित केले होते. मात्र, आता मुदतवाढ मिळाली आहे. तथापि, हा नवा कालावधी किती दिवसांचा राहील याविषयी शासनाच्या स्पष्ट सूचना अजून प्राप्त झालेल्या नाहीत. मात्र, मुदती उलटल्यानंतर देखील शेतकऱ्याकरिता ऑनलाइन अर्ज भरता येत असल्यामुळे ठिबक कंपन्यांची देखील गैरसोय टळली आहे, असे सूत्रांनी स्पष्ट केले.

अनुदानासाठी शेतकऱ्याला पूर्वसंमतिपत्र अत्यावश्यक असते. शेतकऱ्यांनी यापूर्वी २०१३-१४ व २०१४-१५ या कालावधीत पूर्वसंमतिपत्रे दिली. या शेतकऱ्यांनी संच बसविल्यानंतर देखील अनुदान दिले गेले नव्हते. मात्र, अशा शेतकऱ्यांना देखील १९४ कोटी रुपये वाटण्यात आल्यामुळे राज्यातील बहुतेक शेतकऱ्यांच्या अनुदानविषयक तक्रारी निकाली काढण्यात आल्या आहेत.