हमीभावाने कापूस विक्रीसाठी ऑनलाइन नोंदणीची चर्चा

नागपूर  ः तूर, हरभरा, मूग, उडीद, सोयाबीननंतर आता येत्या हंगामात कापसासाठीदेखील ऑनलाइन नोंदणी शेतकऱ्यांना करावी लागण्याची शक्‍यता आहे. नोंदणीनंतरच शेतकऱ्यांना आपला कापूस हमीभाव केंद्रावर विकता येणार आहे. त्या संदर्भाने राज्य व केंद्र शासन स्तरावर चर्चा सुरू असल्याची माहिती सूत्रांनी दिली.

हमीभावाने केवळ शेतकऱ्यांच्याच शेतीमालाची खरेदी व्हावी, या उद्देशाने सरकारने शेतीमाल विक्रीसाठी ऑनलाइन नोंदणीची प्रक्रिया सक्‍तीची केली आहे. यापूर्वी तूर, हरभरा आणि ऑक्‍टोबरपासून मूग, उडीद, सोयाबीन खरेदी केली जाणार आहे. या सर्व शेतीमालाच्या विक्रीसाठी ऑनलाइन नोंदणी केली गेली. हमीभावाने व्यापाऱ्यांचा शेतीमाल विकला जाऊ नये याकरिता ही खबरदारी घेतली गेली. या माध्यमातून गैरप्रकाराला आळा बसल्याचा सरकारचा दावा आहे. त्यामुळे येत्या हंगामात हमीभाव कापूस खरेदीकरिता हाच फंडा अवलंबिण्याचे प्रस्तावित असल्याचे विश्‍वसनीय सूत्रांनी सांगितले.