जळगाव जिल्ह्यात खरेदी केंद्रांतील आॅनलाइन नोंदणी अडखळत सुरू

जळगाव : कडधान्य खरेदीसंबंधी शासकीय खरेदी केंद्रांची तयारी झाली आहे; परंतु प्रत्यक्षात खरेदी सुरू नाही. त्यातच या खरेदीसंबंधी जी ऑनलाइन नोंदणी सुरू आहे, ती अडखळत आहे. जेवढे अर्ज शेतकऱ्यांनी संबंधित खरेदी केंद्राच्या कार्यालयात जमा केले, त्यातील निम्मेच अर्ज ऑनलाइन जमा झाल्याची माहिती मिळाली आहे.

ऑनलाइन नोंदणी सुरू ठेवा, परंतु शासकीय खरेदी केंद्रात खरेदी सुरू करा, अशी मागणी शेतकऱ्यांची आहे. शेतकऱ्यांना रब्बी हंगाम व इतर कारणांसाठी निधीची आवश्‍यकता आहे. जिल्ह्यात तीन खरेदी केंद्रांना मंजुरी दिली आहे. जामनेर येथे केंद्र सुरू करण्यासंबंधीचा निर्णय अजून झालेला नाही. या तिन्ही केंद्रांमध्ये खरेदीसाठी ऑनलाइन नोंदणी सुरूच आहे.

शेतकऱ्यांकडून एक अर्ज, सातबारा उतारा, बॅंक पासबुक व आधार कार्ड यांची झेरॉक्‍स घेतली जात आहे. अर्ज येण्याची गती बऱ्यापैकी होती. परंतु नोंदणी गतीने झाली नाही. सर्व्हर डाउन, ॲपसंबंधीच्या अडचणी कायम आहेत. एका अर्जासोबत तीन पुरावे जोडावे लागतात. ते अपलोड करताना १५ ते २० मिनिटे एकाच अर्जासाठी लागतात. सुमारे तीन हजार अर्ज ऑनलाइन झाले आहेत. पाचोरा, अमळनेर व जळगाव येथे खरेदी केंद्र मंजूर असून, या केंद्रांमध्ये नोंदणी करण्यात येत आहे.

बाजारात दरवाढ

ऑनलाइन नोंदणीची प्रक्रिया अडखळत सुरू असतानाच बाजारात उडीद व मुगाच्या दरात सुधारणा झाली आहे. उडदासह मुगाला ५००० ते ५१०० रुपये प्रतिक्विंटलपर्यंतचे दर आहेत. हे दर टिकून राहतील. कारण उत्पादन कमी आले आहे. यामुळे अनेक शेतकरी शासकीय खरेदी केंद्राची प्रतीक्षा न करता उडीद, मुगाची विक्री करीत आहेत. चोपडा, अमळनेर येथील बाजार समित्यांमध्ये उडदाची बऱ्यापैकी आवक होत असल्याचे सांगण्यात आले.