सोयाबीनसाठी क्विंटलला अवघे १२ रुपये अनुदान

अकोला : राज्य शासनाने जाहीर केलेल्या सोयाबीन अनुदानाचे वितरण सुरू झाले असून, बाळापूर तालुक्यातील एका शेतकऱ्यांना क्विंटलला अवघी १२ रुपये मदत मिळाली आहे. हा शेतकऱ्यांची खिल्ली उडवण्याचा प्रकार असल्याच्या संतप्त प्रतिक्रिया उमटू लागल्या आहेत.

शासनाने गेल्या हंगामात सोयाबीनचे दर घसरल्याने क्विंटलला २०० रुपये अनुदान देण्याचे जाहीर केले होते. यासाठी बाजार समित्यांकडून शेतकऱ्यांचे प्रस्ताव घेण्यात आले. बाळापूर तालुक्यातील खिरपूरी बुद्रुक येथील सोपान दांदळे यांनी अकोला कृषी उत्पन्न बाजार समितीत अठरा क्विंटल सोयाबीन विकले होते. शासनाने अनुदान जाहीर केल्यानंतर त्यांनी रीतसर अनुदानाकरिता लागणारी आवश्यक कागदपत्रे बाजार समितीत दाखल केली. त्यांनी आत्तापर्यंत अनुदानाची प्रतीक्षा केली.

आता अनुदान जमा झाल्याचे कळाल्यानंतर त्यांनी बँक खाते तपासून पाहले असता खात्यामध्ये २६ नोव्हेंबर २०१७ ला अठरा क्विंटल सोयाबीनसाठी दोनशे सव्वीस रुपये अनुदान जमा झाल्याचे दिसून आले. हा प्रकार म्हणजे टिंगल उडवण्यासारखा असल्याचे शेतकऱ्यांचे म्हणणे आहे.

दोनशे सव्वीस रुपये अनुदान म्हणजे शेतकऱ्यांना भिक दिल्यासारखेच. अठरा क्विंटलचे अनुदान छत्तीशे रुपये मिळायला पाहिजे होते; मात्र माझ्या खात्यात दोनशे सव्वीस रुपये जमा झाले आहेत. शासनाने मला नियमानुसार अनुदान द्यायला हवे होते; पण तोकडी रक्कम जमा झाल्याचे दिसत आहे. - सोपान दांदळे , खिरपुरी बुद्रुक, ता. बाळापूर जि. अकोला