नायगाव तालुक्यातील केवळ १०५० शेतकरी कर्जमाफीत

नायगाव, जि. नांदेड  ः नायगाव तालुक्यातील कर्जमाफीच्या यादीतील शेतकऱ्यांची ‘ग्रीन लिस्ट` नुकतीच हाती लागली आहे.  तालुक्यातील ८१ गावांपैकी ७२ गावांतील एक हजार पन्नास शेतकऱ्यांची नावे पहिल्या यादीत आहेत.

यापैकी सहा गावातील प्रत्येकी एकाच शेतकऱ्याचा समावेश आहे. तर नऊ गावातील एकाही शेतकऱ्याचे नाव पहिल्या यादीत नसल्याचे ऑनलाईनवर यादी पाहिल्यानंतर समोर आले आहे.चार वर्षे कोरड्या दुष्काळाला सामोरे गेल्यानंतर सहा महिने अनेक पक्ष संघटनांनी मोर्चे, आंदोलन केल्यानंतर सरकारने कर्जमाफीची घोषणा केली. त्यात असंख्य अटी घातल्या. सगळ्या अटी मान्य करत मोठ्या गैरसोयीला सामोरे जात, रात्रंदिन जागत कर्जमाफीची ऑनलाईन प्रक्रियाही शेतकऱ्यांनी पूर्ण केली. ते झाल्यावरही सरळ स्वरूपात कर्जमाफी केली नाही.

अर्ज भरलेली व्यक्ती शेतकरी आहे की नाही हे सिद्ध करण्यासाठी गावागावात चावडीवाचन झाले. एवढे होऊनही कर्जमाफीची रक्काम खात्यावर जमा व्हायला तयार नाही. दसरा झाला, दिवाळी झाली. दिवाळी होऊन पंधरवाडाही लोटला तरी कर्जमाफीचा वेग वाढायला तयार नाही. १५ नोव्हेंबरपर्यंत  शेतकऱ्यांच्या खात्यावर कर्जमाफीचा निधी जमा होईल असे मुख्यमंत्र्यांनी जाहीर केले आहे.