औरंगाबाद : दुष्काळाच्या झळा तीव्र झालेल्या मराठवाड्यातील उपयुक्‍त पाणीसाठ्यातही झपाट्याने घट होते आहे. मराठवाड्यातील ८६८ लघु, मध्यम, मोठ्या प्रकल्पांसह नद्यांवरील बंधाऱ्यांमध्येही केवळ २५.२८ टक्‍केच उपयुक्‍त पाणीसाठा उरला आहे. सर्वाधिक संख्येने असलेले लघु प्रकल्प झपाट्याने कोरडे पडत असून त्यांमध्ये केवळ १६.९५ टक्‍के तर ७५ मध्यम प्रकल्पात केवळ १७. ६१ टक्‍केच उपयुक्‍त पाणीसाठा शिल्लक आहे.
जनावरांचा चारा आणि पिण्याच्या पाण्याचा प्रश्न मराठवाड्यात हळूहळू गंभीर बनत चालला आहे. मार्चनंतर पाणीसंकटाला सामोरे जावे लागणाऱ्या मराठवाड्यातील जनतेला आता ऑक्‍टोबरपासूनच पाणीटंचाईची झळ सुरू झाली आहे. पाणीसाठ्यांमधील आटत चाललेले पाणीटंचाईमध्ये अधिकची भर घालते आहे. मोठ्या ११ प्रकल्पांपैकी हिंगोली जिल्ह्यातील सिद्धेश्वर प्रकल्पात केवळ २ टक्‍केच उपयुक्‍त पाणीसाठा शिल्लक आहे.
दुसरीकडे बीड जिल्ह्यातील माजलगाव व मांजरा प्रकल्पांत उपयुक्‍त थेंब नाही. उस्मानाबाद जिल्ह्यातील सिनाकोळेगाव प्रकल्पातही उपयुक्‍त पाणी आहे. येलदरीतील उपयुक्‍त पाणीसाठाही ९ टक्‍क्‍यांवर आला आहे. निम्न दुधना प्रकल्प १६ टक्‍के, निम्न मनार ३६ टक्‍के, निम्न तेरणा २८ टक्‍के तर सर्वात मोठा असलेल्या जायकवाडी प्रकल्पातही केवळ ३० टक्‍केच उपयुक्‍त पाणी शिल्लक आहे. विष्णूपूरी आणि उर्ध्व पेनगंगा प्रकल्पच काय ते ६० टक्‍क्‍यांपेक्षा जास्त उपयुक्‍त पाणी असल्याने दिलासा देत आहेत.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.