मराठवाड्यात रब्बी हंगामात केवळ १ टक्‍का कर्जवाटप

औरंगाबाद : मराठवाड्यातील औरंगाबाद, जालना, परभणी व हिंगोली या चार जिल्ह्यांत रब्बी हंगामासाठी दोन महिन्यांत उद्दिष्टाच्या तुलनेत केवळ एक टक्‍का कर्जवाटप केले गेले. त्यामुळे खरीप हातचा गेलेल्या शेतकऱ्यांना रब्बीसाठी एकतर खासगीतून कर्जउचल करून वा उधारीतून खते-बियाण्यांची सोय करण्याची वेळ आली आहे.

औरंगाबाद, जालना, परभणी व हिंगोली या चारही जिल्ह्यांसाठी यंदाच्या खरीप हंगामाकरिता ९३१ कोटी ४५ लाख ८१ हजार रुपयांचे कर्जवाटप करण्याचे उद्दिष्ट देण्यात आले होते. २५ नोव्हेंबरपर्यंत केवळ ९६८ सभासदांना ९ कोटी ५६ लाख ७३ हजारांचे म्हणजे उद्दिष्टाच्या तुलनेत केवळ १ टक्‍का कर्जवाटप करण्यात आले. औरंगाबाद जिल्ह्यात व्यापारी व ग्रामीण बॅंकांच्या शाखांनी, जालना जिल्ह्यात जिल्हा मध्यवर्ती सहकारी बॅंक व ग्रामीण बॅंक, परभणी जिल्ह्यात जिल्हा मध्यवर्ती सहकारी बॅंक व व्यापारी बॅंक आणि हिंगोली जिल्ह्यात जिल्हा मध्यवर्ती सहकारी बॅंकेने अजून कर्जवाटपाच्या मिळालेल्या उद्दिष्टातील एक रुपयाही वाटण्याची तसदी घेतली नाही. औरंगाबाद जिल्ह्यातील ३०८, जालना जिल्ह्यातील १००, परभणी जिल्ह्यातील १०८, तर हिंगोली जिल्ह्यातील ४५२ शेतकऱ्यांनाच रब्बी हंगामासाठी कर्जाचा पुरवठा करण्यात आल्याची माहिती सहकार विभागाच्या सूत्रांनी दिली. औरंगाबाद जिल्ह्यात १ कोटी २ लाख ७८ हजार, जालना जिल्ह्यात १ कोटी ३८ लाख, परभणी जिल्ह्यात ६७ लाख ३१ हजार, तर हिंगोली जिल्ह्यात सर्वाधिक ६ कोटी ४८ लाख ६४ हजारांचे कर्जवाटप करण्यात आल्याची माहितीही सूत्रांनी दिली. एकीकडे कर्जमाफीचा घोळ, दुसरीकडे हातचा गेलेला खरीप त्यातच शेतकऱ्यांना कर्जवाटप करण्यात बॅंकांचे नसलेले स्वारस्य, यामुळे शेतकऱ्यांची कमालीची परवड होत असल्याचे चित्र आहे.