जळगाव जिल्हा परिषदेत विरोधक शांत; सत्ताधाऱ्यांच्याच अधिक तक्रारी

जळगाव : पोषण आहार, शिक्षक बदल्या यावरून जिल्हा परिषदेतील सत्तेत असलेल्या भाजपच्या सदस्य पल्लवी सावकारे यांनी अनेक तक्रारी केल्या आहेत. अलीकडेच त्यांनी भुसावळ तालुक्‍यात अंगणवाड्यांमध्ये पाहणी केली. त्यात वांजोळा गावातील अंगणवाडीतील आहार निकृष्ट असल्याचे त्यांना दिसून आले. परंतु, बाल कल्याण विभागाचे कार्यवाहीकडे दुर्लक्ष आहे. जिल्हा परिषदेत विरोधक शांत आणि सत्ताधाऱ्यांच्या तक्रारी अधिक, अशी स्थिती आहे.

काही दिवसांपूर्वी छापखाना समितीची बैठक झाली. जिल्हा परिषदेचा स्वमालकीचा छापखाना सुरू व्हावा, यासाठी ही समिती असून, या समितीच्या बैठकाच होत नव्हत्या. कारण सत्तेतील पदाधिकारी मंडळीच छापखान्याबाबत उदासीन होती. परंतु, प्रसिद्धी माध्यमांनी टीका केल्यानंतर समितीची बैठक झाली. या समितीने ७० लाख रुपये खर्च लागेल, त्याची तरतूद छापखान्यासाठी केली जावी, अशी अपेक्षा व्यक्त केली आहे. त्यांच्या मागणीसंबंधीदेखील प्रशासन सकारात्मक नाही. शाळांमध्ये बाक खरेदी, भजनी मंडळांसाठी साहित्याच्या पुरवठा या विषयांवरूनही सत्ताधाऱ्यांमध्ये एकमत नाही. यामुळे यासंदर्भातील निविदा व इतर प्रक्रिया हव्या त्या गतीने सुरू नसल्याची कुरबूर जिल्हा परिषदेतील सत्ताधारी सदस्यांमध्ये आहे.

मध्यंतरी जिल्हा परिषदेतील प्रशासनाची मनमानी व काही अधिकाऱ्यांकडून होणारी दिरंगाई याबाबत पदाधिकाऱ्यांनी थेट जलसंपदामंत्री गिरीश महाजन यांच्याकडे तक्रारी केल्या. परंतु, अजून कोणतीही कारवाई संबंधित अधिकाऱ्यांवर झालेली नाही. परिषदेत विरोधकांमध्ये शिवसेना व राष्ट्रवादी कॉंग्रेसचे सदस्य फक्त सभांमध्ये आवाज उठवितात. मात्र, नंतर ते शांत दिसत असल्याचे चित्र आहे.