मराठीच्या मुद्यावर मुख्यमंत्र्यांच्या माफीनाम्याने अधिवेशनाला प्रारंभ

मुंबई : राज्य विधिमंडळाच्या अधिवेशनाला सोमवारी राज्यपाल सी. विद्यासागर राव यांच्या अभिभाषणाने सुरुवात झाली. मात्र, राज्यपालांचे अभिभाषण मराठीत अनुवादित करून ऐकविले जात नसल्याने सरकारने मराठी भाषेचा अवमान केला असल्याचे सांगत विरोधकांनी सरकारच्या विरोधात घोषणाबाजी करीत राज्यपालांच्या अभिभाषणावर बहिष्कार टाकत सोमवारी (ता.२६) सभात्याग केला. राज्यपालांच्या भाषणादरम्यान सभात्याग करण्याची ही दुर्मिळ घटना असल्याचे सांगितले जात आहे.  दरम्यान, मुख्यमंत्री देवेंद्र फडणवीस यांनी विधानसभेत या चुकीसाठी माफी मागितली असून, ही बाब गंभीर असल्याचे सांगत संध्याकाळपर्यंत दोषींना घरी पाठविण्याची मागणी विधानसभा अध्यक्षांकडे केली.  अभिभाषणाची सुरुवात राज्यपालांनी मराठी भाषेतच केली. सुरुवातीला ४ ते ५ मिनिटे मराठीत भाषण केल्यानंतर राज्यपालांनी इंग्रजीमध्ये भाषण करण्यास सुरुवात  केली. इंग्रजी भाषणाचा मराठी अनुवाद वाचण्याची सभागृहाची परंपरा आहे. मात्र, अनुवाद मराठीत होत नसल्याने विरोधक आक्रमक झाले. विरोधकांनी घोषणाबाजी करूनही अनुवाद मराठीमध्ये होत नसल्याने शिक्षणमंत्री विनोद तावडे यांनी अनुवादक कक्षामध्ये जाऊन संपूर्ण भाषण स्वत: मराठीत वाचून दाखवत कमान सांभाळली. मात्र, विरोधकांनी मराठीविरोधी सरकार असल्याची घोषणाबाजी करीत सभात्याग केला.  अभिभाषणाचा मराठी अनुवाद होत नसल्याने विरोधकांसह शिवसेनेच्या तीन-चार सदस्य आणि भाजपचे आमदार आशिष शेलार यांनीही आक्षेप घेतला. विधानभवनातील शिवरायांच्या प्रतिमेजवळ सरकारविरोधी घोषणा देऊन सरकारचा धिक्कार करीत विरोधकांनी आंदोलन केले. 

भाषेचा अपमान : अजित पवार राज्यपालांच्या अभिभाषणामध्ये मराठी भाषांतर नसल्यामुळे भाजपने १२ कोटी मराठी भाषकांचा अपमान केल्याने आम्ही राज्यपालांच्या अभिभाषणावर बहिष्कार घातला असल्याची माहिती विधिमंडळ पक्षनेते अजित पवार यांनी दिली. आमच्या सरकारच्या काळात विधानसभेच्या २८८ व विधान परिषदेच्या ७८ मराठी आमदारांसाठी मराठीमध्ये भाषांतर व्हायचे. मात्र, या वेळी भाषण सुरू होऊन १५ मिनिटे होऊनही भाषांतर केले गेले नाही. आम्ही वारंवार सूचना केली, तरीही भाषांतर झाले नाही. उद्या मराठी भाषा दिन आहे. त्याच्या पूर्वसंध्येलाच मराठीचा अपमान केला गेला आहे. शिवसेनाही या वेळी गप्प बसली होती. त्यामुळेच आम्ही राज्यपालांच्या भाषणावर नाइलाजाने बहिष्कार टाकला.

अनुवाद गुजराती भाषेत : मुंडे      राज्यपालांच्या भाषणाचा अनुवाद गुजराती भाषेत होत असल्याचा दावा विरोधी पक्षनेते धनंजय मुंडे यांनी केला. या प्रकरणाची चौकशी करून कारवाईची मागणी त्यांनी केली. मराठी भाषेच्या पूर्वसंध्येलाच भाजपने अर्थसंकल्पीय अधिवेशनामध्ये राज्यपालांचे अभिभाषण मराठीत न केल्यामुळे मराठी भाषेचा अवमान झाला असून, या संपूर्ण प्रकरणाची चौकशी केली जावी, अशी मागणी विधान परिषदेचे विरोधी पक्षनेते धनंजय मुंडे यांनी केली.