दुष्काळ, आरक्षणाच्या मुद्द्यांवर विधान परिषदेचे कामकाज ठप्प

संग्रहित चित्र
संग्रहित चित्र

मुंबई : दुष्काळग्रस्त शेतकऱ्यांना तातडीने मदत जाहीर करावी, तसेच मराठा, धनगर आणि मुस्लिम समाजाला आरक्षण जाहीर करावे, या मागण्यांसाठी मंगळवारी (ता. २०) विधान परिषदेतही विरोधक आक्रमक झाले. यामुळे झालेल्या गदारोळामुळे कामकाज दिवसभरासाठी स्थगित करावे लागले.

विधान परिषदेचे कामकाज सुरू होताच विरोधी पक्षनेते धनंजय मुंडे यांनी या संदर्भात स्थगन प्रस्ताव मांडला. ते म्हणाले, की १९७२ पेक्षा भयानक दुष्काळ राज्यात पडला आहे. सरकारने दुष्काळ जाहीर करून २२ दिवस उलटले तरी शेतकऱ्यांना मदत किंवा पाणीपुरवठ्यासाठी टॅंकर दिले जात नाहीत. दुष्काळाची गंभीर समस्या निर्माण झाली आहे. राज्यातील शेतकरी आणि शेतमजुरांच्या हाताला काम नाही. हातचे पीक गेले. शेतकऱ्यांनी जगायचे कसे, असा सवाल करतानाच शेतकरी आत्महत्या करत आहेत. आम्हाला सभागृहात चर्चा नकोय, आधी मदत जाहीर करा, अशी मागणी त्यांनी केली. सरकार दुष्काळप्रश्नी गंभीर नाही, असा आरोपही त्यांनी केला.

१९७२ च्या दुष्काळाऐवजी २०१८-१९ मधील या भंयकर दुष्काळाची इतिहासामध्ये नोंद होणार असल्याचे त्यांनी स्पष्ट केले. दुष्काळग्रस्त शेतकऱ्यांना हेक्टरी ५० हजार तर फळबागांचे नुकसान झालेल्या शेतकऱ्यांना हेक्टरी एक लाख रुपयांची मदत सरकारने जाहीर करावी त्याचप्रमाणे दुष्काळी भागातील वीजबिल आणि शैक्षणिक शुल्क माफ करावे, अशा मागण्या मुंडे यांनी केल्या.

कार्यक्रम पत्रिकेत दुष्काळावर नियम २६० अन्वये चर्चा प्रस्तावित असल्यामुळे सभापतींनी स्थगन प्रस्ताव फेटाळून लावला. यावर चर्चा नको तात्काळ मदत जाहीर करा, असा पवित्रा विरोधकांनी घेतला. त्याचप्रमाणे मराठा, धनगर आणि मुस्लिम समाजाला आरक्षण द्यायला सरकार चालढकल करीत आहे असा आरोपही विरोधी पक्षनेत्यांनी केला. मराठा समाजात आरक्षणाबाबत संशयाचे वातावरण आहे, असेही ते म्हणाले.

शासन मराठा समाज आरक्षणाबाबत मागासवर्ग आयोगाचा अहवाल पटलावर ठेवेल, इतर आरक्षणाला धक्का न लावता न्यायालयात टिकेल, असे आरक्षण सरकार देईल, अशी ग्वाही सभागृह नेते चंद्रकांत पाटील यांनी दिली. मात्र विरोधकांचे समाधान झाले नाही. स्थगन प्रस्तावही सभापतींनी फेटाळल्यामुळे विरोधकांनी वेलमध्ये उतरून सरकारविरोधात घोषणाबाजी केली. त्यामुळे, कामकाज पहिल्यांदा अर्ध्या तासासाठी दोनदा आणि नंतर दिवसभरासाठी स्थगित करावे लागले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com