‘लोकमंगल’प्रकरणी विधान परिषदेत गोंधळ

संग्रहित छायाचित्र
संग्रहित छायाचित्र

मुंबई : सहकारमंत्री सुभाष देशमुख यांचा मुलगा संचालक असलेल्या सोलापूरमधल्या लोकमंगल मल्टिस्टेट को ऑपरेटिव्ह सोसायटीमध्ये गैरव्यवहार झाल्याप्रकरणाची न्यायालयीन चौकशी करावी, अशी मागणी करत विरोधकांनी मंगळवारी (ता. २५) विधान परिषदेत गदारोळ केला, यामुळे सभागृहाचे कामकाज दहा मिनिटांसाठी तहकूब करावे लागले.

‘लोकमंगल’ने बनावट कागदपत्रे सादर करून शासकीय अनुदान लाटल्याप्रकरणी काँग्रेसचे गटनेते शरद रणपिसे यांनी तारांकित प्रश्न उपस्थित केला होता. तसेच या प्रकरणात गुन्हा दाखल होऊनही अटक करण्यात आलेली नाही, हे प्रकरण राज्य सरकार दडपण्याचा प्रयत्न करत असल्याचा आरोप केला. या प्रश्नाला उत्तर देताना दुग्धविकास राज्यमंत्री अर्जुन खोतकर यांनी या प्रकरणाचा पारदर्शकपणे तपास सुरू आहे, असे सांगत कोणालाही पाठीशी घालणार नाही, अशी ग्वाही दिली. 

या प्रकरणाचा पोलिस तपास सुरू आहे. ‘लोकमंगल’ने या निधीचा गैरवापर केलेला नाही, ही रक्कम त्यांच्याकडून व्याजासकट वसूल केल्याचे श्री. खोतकर यांनी सांगितले. याप्रकरणी लोकयुक्तांनी अहवाल दिल्यामुळे या प्रकरणाची न्यायालयीन चौकशी होईल का यासंदर्भात सभापतींनी निर्णय घ्यावा, अशी मागणी शिवसेनेच्या अनिल परब यांनी केली. यावर सभापतींनी, लोकायुक्तांनी या प्रकरणात काय निर्णय दिला आहे ते तपासून सभागृहाला सांगण्यात येईल, असे सांगितले.

काय आहे प्रकरण? बोगस कागदपत्रांच्या आधारे दूध भुकटी प्रकल्पासाठी शासकीय अनुदान लाटल्याप्रकरणी लोकमंगल मल्टिस्टेट सहकारी संस्थेचे चेअरमन आणि सुभाष देशमुख यांचे पुत्र रोहन देशमुख यांच्या विरोधात गुन्हा दाखल करण्याचे आदेश सरकारने दिले होते. त्यामुळे लोकमंगल मल्टिस्टेट को-ऑपरेटिव्ह सोसायटीला दूधशाळा विस्तारीकरण आणि दूध भुकटी प्रकल्पासाठी दिलेला पाच कोटींचा अनुदान निधी अखेर या संदर्भात प्राप्त झालेल्या तक्रारींनंतर शासनाने परत घेण्याचा निर्णय घेतला.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com