अकोला : संत्रा पिकाच्या नुकसानीसाठी मिळालेली पीकविम्याची रक्कम राष्ट्रीयीकृत बॅंकांनी थेट कर्जखात्यात वळती केल्याचा प्रकार उघडकीस आला आहे. बॅंकांनी हा पैसा बचत खात्यात जमा करावा, अशी मागणी शेतकऱ्यांनी एका निवेदनाद्वारे केली आहे.
मागील वर्षी आंबिया बहारात शेतकऱ्यांचे मोठे नुकसान झाले होते. या नुकसानीची भरपाई म्हणून विमा कंपनीकडून हेक्‍टरी 17 हजार 500 रुपये शेतकऱ्यांच्या खात्यात जमा करण्यात आल्याचे शेतकऱ्यांचे म्हणणे आहे; मात्र आलेली ही रक्कम काही राष्ट्रीयीकृत बॅंकांनी थेट कर्ज खात्यात जमा करण्याचा प्रताप केला आहे. आपल्याच गावातील इतर शेतकऱ्यांना इतर बॅंकांकडून पीकविम्याची रक्तम मिळाली; मात्र आपल्याला का मिळत नाही हे जाणण्यासाठी शेतकरी बॅंकेत गेले असता त्यांच्या कर्ज खात्यात पैसे जमा केल्याचे बॅंकेच्या व्यवस्थापनाकडून सांगण्यात आले. याबाबत आपणास वरिष्ठांकडून आदेश असल्याचेही त्यांनी शेतकऱ्यांना सांगितले.
याबाबत अकोट तालुक्‍यातील बोर्डी येथील अनेक संत्रा उत्पादकांनी तर अकोट येथील स्टेट बॅंकेच्या शाखाधिकाऱ्यांना निवेदन देऊन मागणीच केली. सुभाष तळोकार, नागोराव कठाळे, दीपक आतकड, अनिल आतकड, रमेश उगले, गजानन शेळके, उमेश भालतिलक, राजेश भालतिलक, श्रीराम भालतिलक, रंजना कठाळे, गजानन भालतिलक, सुनील ताडे, वैभव आतकड, दिलीप तळोकार, गोपाल भालतिलक यांच्यासह इतर शेतकऱ्यांनी दोन दिवसांपूर्वी निवेदन दिले आहे. यावर अद्याप कुठलाच तोडगा बॅंकेकडून काढला गेला नसल्याचे शेतकऱ्यांचे म्हणणे आहे.
शेतकऱ्यांची उडाली झोप या वर्षी खरीप हंगाम चांगला आलेला नसल्याने शेतकऱ्यांना पैशांची गरज आहे. ऐन दिवाळीच्या काळात हे पैसे हातात पडले असते. पीकविम्याची रक्कम कर्जखात्यात वळविल्याने शेतकऱ्यांची झोप उडाली आहे. या सर्व बाबींचा विचार करताना बॅंकेने सेव्हिंग (बचत) खात्यात पैसे वळती करावे, अशी मागणी शेतकरी करत आहेत.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.