लिंबूवर्गीय झाडांच्या पानांचे परीक्षण महत्त्वाचे ः रॅमॉन नेव्हिया

नागपूर   ः लिंबूवर्गीय पीक उत्पादनामध्ये पानांची भूमिका महत्त्‍वाची आहे. त्यामुळे माती, पाण्यासोबतच पानांचे देखील परिक्षण तितकेच महत्त्वाचे ठरते. संत्रा उत्पादकांनी सर्वप्रथम पानांचे परिक्षण करून घ्यावे, त्यानुसार पीक व्यवस्थापन करावे, असा सल्ला स्पेन येथील आंतरराष्ट्रीय संत्रा सल्लागार रॅमॉन नेव्हिया यांनी दिला.

हातला (ता. काटोल) येथील धीरज जुनघरे यांच्या सघन संत्रा बागेला रॅमॉन नेव्हिया यांनी भेट दिली. महाऑरेंजच्या माध्यमातून संत्रा उत्पादकांसाठी कार्यशाळेचे आयोजन करण्यात आले होते. कार्यशाळेला स्पेन येथील बीयाट्रीझ, शॉव, महाआॅरेंजचे कार्यकारी संचालक श्रीधर ठाकरे, राहूल ठाकरे, सुधीर जगताप, मनोज जवंजाळ, महेश दामोदरे, चंद्रशेखर बोंडे, देवेन बडोला, महेश दामोदरे यांची उपस्थिती होती.

रॅमॉन नेव्हिया म्हणाले, की पानात होणारे बदल फळांच्या अवस्थेच्या बदलास पूरक ठरतात. त्याकरिता पानांचे परिक्षण हा महत्त्वाचा टप्पा आहे. प्रयोगशाळेतील पृथ्थकरणाअंती पानांमध्ये नेमक्‍या कोणत्या घटकांची कमतरता आहे, हे लक्षात येते. नवती फुटत असताना पाने परिक्षणाकरिता पाठवू नये. परिक्षणाकरिता पाठविण्यात येणारी पाने एकसारखीच असावी. एका झाडापासून सरासरी चार पाने याप्रमाणे एकरातून ४० ते ५० पाने परिक्षणाकरिता पाठवावी.

राहूल ठाकरे यांनी कार्यशाळेच्या आयोजनामागील भूमिका मांडली. संत्रा उत्पादकांनी यापुढील काळात उत्पादकता वाढीसाठी शास्त्रोक्‍त व्यवस्थापन पद्धतीचा अवलंब करावा, असे आवाहन श्रीधर ठाकरे यांनी या वेळी केले. सूत्रसंचालन मनोज जवंजाळ यांनी केले.