नागपूर ः रंग आणि चवीच्या बाबतीत वेगळेपण जपणाऱ्या नागपुरी संत्र्यांची बहरीन आणि कुवैतला निर्यात झाल्यानंतर प्रथमच दुबई येथूनदेखील त्यास मागणी नोंदवण्यात आली. त्यानुसार दुबईला तब्बल दोन हजार किलो संत्र्यांची निर्यात नुकतीच (ता. १६) हवाईमार्गे करण्यात आली. महाऑरेंजने यासाठी पुढाकार घेतला.
विदर्भाचे मुख्य पीक असलेल्या संत्र्याच्या निर्यातीला चालना मिळावी, याकरिता केंद्रीय मंत्री नितीन गडकरी प्रयत्नशील आहेत. त्याच प्रयत्नांचा भाग म्हणून त्यांनी महाऑरेंजला थेट विमानतळावर संत्रा विकण्याकरिता आउटलेट उपलब्ध करून दिले आहे. विमानमार्गे भारतात येणाऱ्या परदेशी नागरिकांना या आउटलेच्या माध्यमातून नागपुरी संत्र्यांची चव चाखता येणार आहे. लवकरच हे आउटलेट सुरू होईल, अशी माहिती आहे.
दरम्यान बहरीन आणि कुवैतला नागपुरी संत्र्यांची निर्यात आठवडाभरापूर्वी करण्यात आली होती. याकरिता विमानसेवेचा उपयोग करण्यात आला. दीड हजार किलो संत्रा या दोन्ही देशांत पाठविण्यात आला. त्यानंतर गुरुवारी (ता. १५) रात्री कतार एअरवेजच्या माध्यमातून दोन हजार किलो संत्रा शारजा मार्गे दुबईला पाठविण्यात आला. शुक्रवारी (ता. १६) सकाळी तो दुबईत दाखल झाला. तेथील मॉलमध्ये हा संत्रा विक्रीसाठी ठेवण्यात येणार आहे.
महाऑरेंजने या फळपिकाला आंतरराष्ट्रीय बाजारपेठ मिळवून देण्यासाठी सातत्याने प्रयत्न केले आहेत. त्याचाच परिपाक म्हणून कुवैत आणि बहरीन यांनी पुन्हा एका कंटेनरची मागणी नोंदविली आहे.
१५० ते २०० ग्रॅम वजनाचा ए ग्रेड अर्थात स्थानिक भाषेत ९६ दाणा संत्रा येथे पाठविण्यात आला. एका बॉक्समध्ये १२ संत्रा फळे ठेवून त्याचे पॅकिंग करण्यात आले. संत्रा फळांना खास नेट लावण्यात आली होती. या हंगामातील सर्वांत उच्चांकी ४८ हजार रुपये प्रतिटन असा दर संत्रा उत्पादकाला यासाठी देण्यात आला, अशी माहिती महाऑरेंजचे कार्यकारी संचालक श्रीधर ठाकरे यांनी दिली.