हुमणीबाधित उसाचे पंचनामे करण्याचे आदेश

सोलापूर : पावसाने हुलकावणी दिल्याने आधीच हैराण असलेल्या सोलापूर जिल्ह्यातील शेतकऱ्यांसमोर आता ऊसावरील हुमणीच्या आक्रमणामुळे मोठ्या प्रमाणात अडचणी आहेत. गेल्या काही दिवसांपासून शेतकरी संघटनांसह काही पक्षांनी सातत्याने याबाबत मागणी लावून धरली आहे. पण अद्यापही काहीच कार्यवाही होत नव्हती. दस्तुरखुद्द कृषी राज्यमंत्री सदाभाऊ खोत यांच्यापर्यंत हे प्रकरण गेले. अखेरीस त्यांनी हुमणीबाधित उसाचे पंचनामे करण्याचे आदेश दिले आहेत.

जिल्ह्यातील पंढरपूर, माढा, माळशिरस, मोहोळ, मंगळवेढा या ऊस पट्ट्यात प्रामुख्याने हुमणीचा मोठा प्रार्दुभाव झाला आहे. या वाढत्या अतिक्रमणाने जिल्ह्यातील ऊस शेती संकटात आली आहे. सर्वाधिक साखर कारखाने असलेला जिल्हा म्हणून सोलापूरची ओळख आहे. जिल्ह्यात यंदाही जवळपास दीड लाख एकरवर उसाची लागवड आहे. जिल्ह्यातील उसाला हुमणी अळीचा प्रादुर्भाव झाल्याने जिल्ह्यातील हजारो हेक्‍टरवरचे पीक वाया चालले आहे. हुमणी अळीमुळे बाधित झालेल्या ऊस क्षेत्राचे तातडीने पंचनामे करण्याचे आदेश जिल्हा प्रशासनाने दिले आहेत.

माळशिरस, पंढरपूर, मोहोळ तालुक्‍यात मोठ्या प्रमाणात या अळीचा प्रादुर्भाव बघायला मिळत आहे. संबंधित तालुक्‍यातील कृषी विभाग व महसूल यंत्रणा यांच्या माध्यमातून हे पंचनामे केले जाणार आहेत. तालुका स्तरावरून अहवाल आल्यानंतर शेतकऱ्यांना मदत देण्याबाबत राज्य सरकारकडे सोलापूर जिल्ह्याच्या वतीने प्रस्ताव पाठविला जाण्याची शक्‍यता आहे. त्यामुळे सध्या तरी पंचनामे आणि अहवाल इथपर्यंत ही प्रक्रिया थांबली आहे. मदतीबाबत अद्याप काहीच हालचाली नाहीत.