सेंद्रिय शेती उत्पादनांना मोठी बाजार संधी

मुंबई : जगात सेंद्रिय शेती उत्पादनांच्या बाजारवाढीला मोठा वाव आहे. सेंद्रिय शेती करताना छोट्या शेतकऱ्यांना एकत्र करून उत्पादित शेतीमालाचे प्रमाणीकरण करता आले, तर मोठे सेंद्रिय मार्केट उभे करता येईल, असे प्रतिपादन आंतरराष्ट्रीय मार्केटतज्ज्ञ हिरोईकी ओनिशी (जपान) यांनी बुधवारी (ता. ७) केले.  येथील वर्ल्ड ट्रेड सेंटरमध्ये आयोजित नैसर्गिक व सेंद्रिय शेती उत्पादने प्रदर्शन आणि विक्री परिषदेच्या उद्‌घाटनावेळी ते बोलत होते. या वेळी आंतरराष्ट्रीय मार्केटतज्ज्ञ (कॅनडा) पॅट हॉवेस, महाराष्ट स्पर्धाक्षम कृषी विकास प्रकल्पाचे नियंत्रण व मूल्यमापन विशेषज्ञ डॉ. संजय पांढरे, देवनंदनी शेतकरी उत्पादक संघाचे संचालक माउली तुपे आदी उपस्थित होते. ही परिषद तीन दिवस चालणार आहे.  श्री. ओनिशी म्हणाले, सध्या जगभरातून सेंद्रिय शेती उत्पादनांना मोठी मागणी येत आहे. सेंद्रिय बाजाराच्या वाढीसाठी मोठी संधी असून, त्याचा लाभ शेतकऱ्यांना शक्य आहे. सध्या शेतीमध्ये रसायनांचा वापर वाढला आहे. अशा रासायनिक शेतीच्या काळात सेंद्रिय शेती करताना उत्पादनांचे प्रमाणीकरण करणे आवश्यक आहे.  छोट्या शेतकऱ्यांना वैयक्तिकपणे प्रमाणीकरण करताना अडचणी येतात. त्यासाठी अशा शेतकऱ्यांना एकत्र करून सेंद्रिय शेती उत्पादनांचे मोठे मार्केट उभे करता येईल. यात शेतकरी आणि ग्राहकांचेही हित साधणे शक्य आहे. 

या वेळी डॉ. पांढरे म्हणाले, की आतापर्यंत हे प्रदर्शन फक्त व्यापारी कंपन्यांपुरतेच मर्यादित होते. सोळा वर्षांत प्रथमच सेंद्रिय उत्पादक गट, कंपन्या यात सहभागी झाल्या आहेत. राज्यात आजवर शेतकरी उत्पादक कंपन्या स्थापन झाल्या आहेत. तर एक लाखाहून अधिक शेतकरी गट कार्यरत आहेत. गेल्या तीन वर्षांत पारंपरिक कृषी विकास योजनेअंतर्गत सेंद्रिय शेती उत्पादन घेणाऱ्या एक हजार शेतकरी गटांची निर्मिती झाली आहे. राज्यात मोठ्या प्रमाणावर एनपीओपी, एनओपी, ईयू प्रमाणीकरण करणारे शेतकरी आहेत. 

येत्या काळात सेंद्रिय शेती शेतकऱ्यांना चांगले उत्पन्न देणारी शेती ठरणार आहे. त्यामुळे शेती उत्पादनांचे प्रमाणीकरण आणि शेतकऱ्यांना बाजार सुविधा उपलब्ध करून दिल्यास सेंद्रिय शेती किफायतशीर करता येईल. राज्यात कृषी यांत्रिकीकरणाच्या अनेक योजना सुरू आहेत. याद्वारे शेतकऱ्यांना मार्केटशी जोडण्याचा प्रयत्न या परिषदेद्वारे करण्यात येत असल्याचे डॉ. पांढरे यांनी सांगितले. परिषदेत राज्यातील सुमारे दीडशे शेतकरी उत्पादक गट, कंपन्यांचे प्रतिनिधींसोबत परदेशी व्यापाऱ्यांचे खरेदी-विक्रीचे करार होतील असे सांगण्यात आले.