एक लाख हेक्टरवरील कपाशीचे पंचनामे बाकी

जळगाव ः जिल्ह्यात अद्याप सुमारे साडेतीन लाख हेक्‍टरवरील कापसाचे पंचनामे पूर्ण झाले आहेत. आणखी सुमारे एक लाख हेक्‍टरचे पंचनामे करायचे असून, काही ठिकाणी फेरपाहणी किंवा फेरपंचनाम्यांचे प्रकारही घडल्याची माहिती आहे; परंतु कुठेही फेरपंचनामे झालेले नसल्याचे कृषी विभागाचे म्हणणे आहे.  जिल्ह्यात चार लाख ७५ हजार हेक्‍टरवर कापसाची लागवड झाली होती. यातील पूर्वहंगामी कापसाखालील क्षेत्र नोव्हेंबरपासूनच रिकामे व्हायला सुरवात झाली. क्षेत्र अधिक व कर्मचारी संख्या कमी, अशी स्थिती असल्याने पंचनाम्यांची कार्यवाही अपूर्ण आहे. ज्या शेतकऱ्यांनी कापूस बियाणे खरेदीचे बिल किंवा पावतीसोबत जे अर्ज कृषी विभागाकडे सादर केले आहेत, त्यांचे पंचनामे सध्या सुरू आहेत. त्यांचे पंचनामे आटोपल्यानंतर बिलांशिवाय जे अर्ज सादर केलेल्या शेतकऱ्यांच्या कापूस पिकाचे पंचनामे केले जातील, अशी माहिती मिळाली. 

कायदेशीरदृष्ट्या मजबूत कार्यवाही भरपाई कापूस बियाणे उत्पादक कंपन्यांच्या माध्यमातून मिळवून द्यायची आहे. त्यासंदर्भात कंपन्या न्यायालयात जाण्याच्या तयारीत असल्याचे लक्षात घेता कृषी विभाग न्यायालयात आपली बाजू सक्षमपणे मांडता यावी या दृष्टीने सर्व कागदपत्रांसह पंचनाम्यांची कार्यवाही करत आहे. यामुळे पंचनाम्यांच्या प्रक्रियेला थोडा  वेळही लागत आहे. बिले, पंचनामे, स्वाक्षऱ्या, पाहणी, काही महत्त्वाच्या ठिकाणी छायाचित्रेही घेतली जात असल्याचे सांगण्यात आले. यातूनच जामनेर व मुक्ताईनगरात कृषी विभागातील अधिकाऱ्यांनी जाऊन पाहणी केल्याची माहिती मिळाली.  पंचनाम्यांच्या कार्यवाहीला आणखी एक महिना कालावधी लागणार आहे. काही दिवसांनंतर ज्यांनी बिलांशिवाय सातबारा उताऱ्यावरील नोंदीसह जे अर्ज सादर केले आहेत, त्यांच्या कापसाच्या शेतात पंचनामे केले जाणार असल्याचे कृषी विभागाने स्पष्ट केले आहे. यासंदर्भात अधिक माहितीसाठी जिल्हा गुणवत्ता निरीक्षक अमित पाटील यांच्याशी मोबाईलवर संपर्क साधला असता त्यांनी प्रतिसाद दिला नाही. 

धरसोडीचे प्रकार सुरूच अनेक गावांमध्ये एका ठिकाणी बसून कृषी सहायकांनी पंचनामे केल्याच्या तक्रारी कायम आहेत. यात धरसोड झाली. थेट शेतात जाणे पंचनामा पथकांनी टाळल्याची कुरबूर सुरूच आहे.