सेंद्रिय शेतीला पाठबळ देणार : पांडुरंग फुंडकर

सिंदखेडाराजा, जि. बुलडाणा  : आज पोषक अन्न प्रत्येकाला हवे आहे. ते सेंद्रिय शेतीमधून मिळू शकते. यासाठी शेतकऱ्यांनी सेंद्रिय शेतीकडे वळले पाहिजे. यासाठी शासन तुम्हाला पाठबळ देईल, असे मत कृषिमंत्री पांडुरंग फुंडकर यांनी व्यक्त केले. गोपालन करीत पारंपरिक सेंद्रिय शेती करण्याच्या दृष्टीने शेतकऱ्यांमध्ये जनजागृती व्हावी, या उद्देशाने भारतीय गोवंश संरक्षण संवर्धन परिषदेच्या वतीने अायोजित शेतकरी जागर यात्रेचे सोमवारी (ता.१५) सिंदखेडराजा येथे उदघाटन करण्यात अाले. विदर्भात सिंदखेडराजा ते वर्धा अाणि अहेरी (जि. गडचिरोली) ते वर्धा अशा एकाचवेळी दोन यात्रा काढण्यात येत अाहेत. या यात्रेचे उदघाटक म्हणून श्री. फुंडकर सिंदखेडराजा येथे बोलत होते. सुरवातीला कृषिमंत्री फुंडकर यांच्या हस्ते या यात्रेचे उदघाटन झाले.  श्री. फुंडकर पुढे म्हणाले, की देशात गेल्या ५० वर्षांच्या काळात हरितक्रांतीच्या नावाखाली रासायनिक शेतीला प्रोत्साहन देण्यात अाले. यामुळे अनेक विपरीत परिणाम घडले. अाता शेतकऱ्यांना पारंपरिक सेंद्रिय शेती करण्याकडे वळविण्यासाठी भारतीय गोवंश संवर्धन परिषद जनजागृतीसाठी पुढाकार घेत अाहे. रासायनिक शेतीमुळे जमिनीचा पोत बिघडला. त्यामुळे वेगवेगळ्या समस्या तयार होत आहेत. यासाठी सेंद्रिय शेती ही फायदेशीर आहे.  कार्यक्रमाला सेंद्रिय शेती करणारे यवतमाळ येथील राजेश्‍वर निवल, शेतकरी जागर यात्रेचे संयोजक अमोल अंधारे, नारायण महाराज शिंदे, विश्‍व हिंदू परिषदेचे प्रांत सहमंत्री सनद गुप्ता, शेतकरी यात्रा प्रमुख दिवाकर नेरकर, जिल्हा सेंद्रिय शेती कंपनीचे समाधान शिंगणे, उद्धव हिवराळे प्रामुख्याने उपस्थित    होते.