खानदेशात नव्या हंगामातील पपईची आवक

जळगाव : नव्या हंगामातील दर्जेदार पपईची आवक सुरू झाली आहे. ती कमी असली तरी सुरवातीच्या दरांचा काहीसा लाभ अर्ली लागवड केलेल्या शेतकऱ्यांना होत असून, दर्जेदार फळांना किमान १५०० रुपये प्रतिक्विंटलचा दर मिळत आहे. सध्या आवक शहादा (जि. नंदुरबार), तळोदा व शिरपूर भागातून सुरू आहे. चोपडा तालुक्‍यातही काही शेतकऱ्यांच्या शेतात पपईचे तोडे झाल्याची माहिती मिळाली.

पपईची काढणी किरकोळ स्वरूपात आहे. नंदुरबार जिल्ह्यात शहादा, नंदुरबार, तळोदा, नागपुरात सुमारे दीड हजार हेक्‍टर, धुळे जिल्ह्यात धुळे, शिरपुरात सुमारे ५०० हेक्‍टर, जळगाव जिल्ह्यात यावल, रावेर, चोपडा, जळगाव, पाचोरा व जामनेर भागात मिळून एक हजार हेक्‍टरवर पपईचे पीक आहे. पावसाच्या भीतीने शेतकरी सुरवातीचे तोडे करून घेत आहेत. नंदुरबार भागात कमी, तर धुळ्यात काही भागात पुरवठा सुरू आहे. दसऱ्यानंतर तो वाढण्याचा अंदाज आहे.

दर्जेदार पपईच्या खरेदीसाठी राजस्थान, मध्य प्रदेशातील खरेदीदार येत आहेत. काही व्यापाऱ्यांनी पपईच्या बागांची पाहणी करून आगाऊ नोंदणी केली आहे. सध्या थेट शेतात १५ रुपये, तर बाजार समितीत कमी दर्जाच्या फळांना १० ते १५ रुपये प्रतिकिलोचा दर आहे. जळगाव बाजार समितीत मागील दोन दिवसांपासून प्रतिदिन सात क्विंटल पपईची आवक झाली.